პარასკევს, 5 დეკემბერს, 18:00 საათზე, მერაბ ბერძენიშვილის სახელობის კულტურის საერთაშორისო ცენტრ „მუზაში" (საქართველო, თბილისი, კუს ტბის გზა # 1), არასამთავრობო ორგანიზაცია „ეკონომიკური პოლიტიკის ექსპერტთა ცენტრის" წარმომადგენლები, „ფრიდრიხ ნაუმანის" ფონდის მხარდაჭერით განხორციელებული პროექტის დასკვნით - შემაჯამებელ საღამოს მართავენ.
პროექტის სახელწოდებაა: „თავისუფლება და ეკონომიკური თავისუფლება - კერძო საკუთრება, როგორც თავისუფლების გარანტი". ეს ზოგადი და ერთგვარად საყოველთაო ხასიათის თემა, თავის თავში მოიცავს ამავე პროფილის სხვა საინტერესო ქვეთემებსაც. ეს ქვეთემებია: „თავისუფლებისა და ეკონომიკური თავისუფლების როლი ეკონომიკურ პოლიტიკაში"; „კერძო საკუთრება და ეკონომიკური თავისუფლების ხარისხი"; „კერძო საკუთრება და ეკონომიკური თავისუფლების დონე საქართველოში"; „ეკონომიკური თავისუფლება - გლობალური კრიზისიდან ლოკალურ წარმატებამდე"; „ეკონომიკური თავისუფლება და ეკონომიკური თავისუფლების ინდექსები"; „კერძო საკუთრება და ეკონომიკური თავისუფლება".
აღნიშნული პროექტის დასკვნით - შემაჯამებელ საღამოზე მოხსენებებით გამოვლენ: „ეკონომიკური პოლიტიკის ექსპერტთა ცენტრის" პრეზიდენტი, ეკონომიკის მეცნიერებათა დოქტორი რამაზ გერლიანი, ამ ორგანიზაციის აღმასრულებელი დირექტორი ქეთევან კრიალაშვილი, ამავე ორგანიზაციის წარმომადგენელი, ეკონომიკის მეცნიერებათა დოქტორი ირაკლი მაკალათია. სიტყვით გამოვლენ მოწვეული მომხსენებლებიც, კერძოდ: იოსებ ბაჩიაშვილი - „საქართველოს მეცნიერთა ეროვნული აკადემიის" პრეზიდენტის მოადგილე და ვანო ჩხაიძე - ეკონომისტი, საინვესტიციო კომპანია „ვ და გო" - ს პრეზიდენტი.
