პარლამენტის ვიცე სპიკერის განცხადებით ლიტვის და პოლონეთის მხარდაჭერა და მათთვის ინფორმაციის მიწოდება ქვეყნის ოკუპაციასთან დაკავშირებით, ძალიან მნიშვნელოვანია.
"საზღვარი არის იქ, სადაც არის ჩვენი სახელმწიფო საზღვარი და ჩვენ ვერანაირად ვერ გავავლებთ საზღვარს ე.წ. სამხრეთ ოსეთსა და აფხაზეთს შორის. ეს არის ჩვენი ტერიტორია... იმ მავთულხლართების იქითაც და მავთულხლართების აქეთაც... და თუ რუსები რამეს ცდილობენ და მავთულხლართებს აბამენ - ეს არის ის საკითხი, რომელიც ჩვენ ყველგან უნდა წამოვწიოთ ყველა დონის შეხვედრაზე"-ამის შესახებ პარლამენტის ვიცე- სპიკრემა გადაცემა „პოლიტმეტრში" სტუმრობისას განაცხადა.
მანანა კობახიძე პრობლემის მოგვარების ერთადერთ გზას მშვიდობიანი მოლაპარაკებების ფორმატში ხედავს, რაც მისი თქმით დიპლომატიურ ფარგლებში უნდა მოხდეს. "მოთმინება უნდა გვეყოს იქამდე, ვიდრე ეს არის საჭირო. იმიტომ, რომ რუსეთთან ურთიერთობის სხვა გზა უბრალოდ არ არსებობს. ჩვენ ვერანაირად ვერ გადავუხვევთ ამას. იარაღის ენით საუბრის დაწყება რუსეთთან ჩვენთვის დამღუპველი იქნება" - აცხადებს კობახიძე და აღნიშნავს , რომ ნაციონალურმა მოძრაობამ რუსეთთან ურთიერთობის გასაუარესებლად ყველაფერი გააკეთა.
„2008 წლის აგვისტომდე რაც იყო, იმაზე უარესი მივიღეთ 2008 წლის აგვისტოს სახით და შემდგომ პერიოდში. მათმა აგრესიულმა რიტორიკამ მოიტანა ეს შედეგი. მცდარი ნაბიჯი იყო, როცა სააკაშვილი მოსახლეობას არარსებულ საფუძველზე, ჰპირდებოდა, რომ ერთ მშვენიერ დღეს ახალ წელს სოხუმში აღნიშნავდა. ეს დაპირებები იყო აბსოლუტურად ცრუ და მსგავს სიტყვებს ვერცერთი პრეზიდენტობის კანდიდატი ასე ღიად ვერ იტყვის დღეს" -პარლამეტის ვიცე- სპიკერს იმედი აქვს, რომ მშვიდობიანი გზით ქვეყანა ტერიტორიულ მთლიანობას დაიბრუნებს. „ბოლოს და ბოლოს რუსეთი თავიდან ბოლომდე პუტინი არ არის და დადგება ალბათ ის დრო, როდესაც ჩვენ დიპლომატიითა და სწორი ნაბიჯებით ეტაპობრივად, ნაბიჯ -ნაბიჯ მივალთ იქამდე, რომ აღვადგენთ ქვეყნის მთლიანობას. ეს რომ არ მოხდება სამხედრო და ომის გზით, ფაქტია და არც უნდა მოხდეს"-აცხადებს მანანა კობახიძე.
