რეინტეგრაციის მინისტრი, პაატა ზაქარეიშვილი ადგილობრივ ხელისუფლების წარმომადგენლებთან ერთად, სოფელ პერევის მოსახლეობას შეხვდა. მინისტრი მოსახლეობის პრობლემებს გაეცნო და მათი მოგვარების გზებზე ისაუბრა. შეხვედრაზე საუბარი გადაადგილების პრობლემას და ოკუპირებულ ტერიტორიაზე მოქცეული საძოვრებისა და სახნავ-სათესი მიწების საკითხს შეეხო. ასევე განიხილეს საოკუპაციო ხაზს მიღმა სოფლების- სინაგურისა და ქარძმანის მოსახლეობასთან მიმოსვლის საკითხი. საჩხერის მუნიციპალიტეტის საკრებულოს თავმჯდომარის- ინგა ზაბახიძის თქმით, აღნიშნული სოფლების მოსახლეობას ქართული პასპორტების აღების სურვილი აქვთ. როგორც პაატა ზაქარეიშვილმა განმარტა, ოკუპირებული ტერიტორიების საზღვრისპირა სოფლების მოსახლეობის პრობლემების გადაჭრის გზებზე, მთავრობისა და საერთაშორისო ორგანიზაციების წევრებთან ერთად იმსჯელებს.
„ხელისუფლების ამოცანაა, გამყოფი ხაზის გასწვრივ მცხოვრებ მოსახლეობას მაქსიმალურად შეგიწყოთ ხელი და უკეთესი საცოხოვრებელი პირობები შეგიქმნათ",- განუცხადა ადგილობრივებს პაატა ზაქარეიშვილმა.
