ფინანსთა მინისტრის მოადგილე გიორგი კაკაურიძე "ნაციონალური მოძრაობის" ბრალდებებს ეხმაურება და აცხადებს, რომ ტერმინი - ქაღალდზე შესრულებული ბიუჯეტი არ ესმის რას ნიშნავს. კაკაურიძის თქმით ბიუჯეტი 100 პროცენტითაა შესრულებული.

„ვერ ვიტყვი, რას გულისხმობენ ქაღალდზე შესრულებულ ბიუჯეტში, მსგავსი ტერმინი არ არსებობს მსოფლიოს არცერთ ქვეყანაში და მით უმეტეს, არც საქართველოში. შემოსულობების ნაწილი გადაჭარბებით არის შესრულებული, რაც შეეხება გადასახდელებს, ამ კუთხით ათვისება არის ყველაზე მაღალი 2014 წლის განმავლობაში, ეს არის 98.8 პროცენტი. ინფრასტრუქტურული პროექტები, რაც დაგეგმილი იყო, დიდი ნაწილი შესრულებულია," - აცხადებს კაკაურიძე

შეგახსენებთ, „ნაციონალური მოძრაობის" წევრმა ზურაბ ჯაფარიძემ განაცხადა, რომ ფინანსთა სამინისტრო ცრუობს და ბიუჯეტი არ შესრულებულა.

„ბიუჯეტი არ შესრულებულა შემოსავლების ნაწილში. ფინანსთა სამინისტროს ფურცელზეა მხოლოდ ის შესრულებული და აღებული საგარეო ვალით, რომელიც ბოლო 2 თვეში ავიღეთ," - აცხადებს ზურაბ ჯაფარიძე.