ევროპის ცენტრში, კონკრეტულად ჟურნალისტებზე, ასეთი სასტიკი ფორმით ნადირობა, ათმაგად შემაშფოთებელი და დასაგმობია!
„რეპორტიორის" ჟურნალისტთა კოლექტივი არა მარტო უცხადებს სოლიდარობას საფრანგეთის ჟურნალისტურ ორგანიზაციებს, არა მარტო იზიარებს დაღუპული ჟურნალისტების ოჯახების, ახლობლების, მეგობრების და კოლეგების ტკივილს, არამედ უერთდება საზოგადოების ცივილიზებული ნაწილის აღშფოთებას და გმობს მომხდარს, რადგან მიაჩნია, რომ ნებისმიერ ფიზიკურ ანგარიშსწორებასა და სიცოცხლის ხელყოფას მხოლოდ უბედურება მოაქვს, რაც კიდევ უფრო ამწვავებს, უფრო ზრდის დაპირისპირების ნაპრალს, რელიგიურ ფუნდამენტალისტებსა და მსოფლიო საზოგადოებას შორის!
„რეპორტიორი" მოუწოდებს კოლეგებს ყველგან, საზღვარგარეთ თუ საქართველოში კვლავაც შეუპოვრად ამხილონ ძალადობის მკვებავი ძალები, რელიგიური ფუნდამენტალიზმის და ადამიანებზე ძალადობის ნებისმიერი გამოვლინება რომელი მხრიდან და რა ფორმითაც არ უნდა მომდინარეობდეს ის. ამასთან კომპეტენტურად, მაქსიმალური სიფრთხილით გააშუქონ რელიგიურ რწმენასთან დაკავშირებული უაღრესად ფაქიზი თემატიკა, ისე, როგორც ამას ითვალისწინებს საერთაშორისო ჟურნალისტური ეთიკის ნორმები.
