"როდესაც ადამიანის უფლებების სავარაუდო რღვევას აქვს ადგილი და ამაზე ხმამაღლა ვსაუბრობთ, ზოგიერთი პოლიტიკოსისთვის ყველაზე ცუდი საიას აქტიურობაა." - ეს კომენტარი "ახალგაზრდა იურისტთა ასოციაციის" თავმჯდომარემ, საზოგადოებრივი მაუწყებლის ეთერში, საპარლამენტო უმრავლესობის წარმომადგენლის, თინა ხიდაშელის განცხადების საპასუხოდ გააკეთა.
კოჟორიძის თქმით, თინა ხიდაშელი არასწორად მოიქცა, როდესაც „ახალგაზრდა იურისტთა ასოციაციის" მოთხოვნა, მამუკა მიქაუტაძის საქმის შს სამინისტროდან პროკურატურისთვის გადაცემაზე, არაპროფესიონალურ მოთხოვნად შეაფასა.
„კანონში წერია, როდესაც პოლიციელი ჩადის დანაშაულს, პროკურატურამ უნდა გამოიძიოს,"- განაცხადა კახა კოჟორიძემ. მისი თქმით, პოლიტიკოსების მხრიდან მსგავსი ტიპის განცხადებები არასამთავრობო ორგანიზაციის საქმიან რეპუტაციას ზიანს აყენებს.
შეგახსენებთ, თინა ხიდაშელმა საზოგადოებრივი მაუწყებლის ეთერში აღნიშნა, რომ საია, საკუთარი განცხადებებით, არასამთავრობო ორგანიზაციის ფუნქციას სცდება.
