ეროვნული ბანკის ყოფილი პრეზიდენტი რომან გოცირიძე ლარის დევალვაციასა და მიმდინერა პროცესებზე საუბრობს და აცხადებს, რომ ეროვნული ვალუტის გადასარჩენად საჭირო გახდა ეკონომიკური ზრდის შეჩერება. ამის შესახებ გოცირიძემ „რუსთავი 2"-ის ეთერში განაცხადა.
„ეროვნული ბანკის გავლენის სფერო არის ფულის მასა. ეროვნული ბანკის მთავარი ამოცანა ფასების სტრაბილურობაა. ერთადერთი რამ რაც მას შეუძლია, ეს არის ფულის მასის მატება ან კლება. ეროვნული ბანკის ნაბიჯი სწორი იყო. ყველაზე დიდი რისკი ამ ეტაპზე არის ფასების ზრდა და სწორედ ამიტომ გახდა იძულებული ეროვნული ბანკი მიემართა არაპოპულარული გზისთვის, რომელიც ფულის მასის კლებას ითვალისწინებს. ეს საბოლოო ჯამში ნიშნავს სამუშაო ადგილებისა და ეკონომიკური ზრდის შემცირებას. ამ შემთხვევაში, თუკი ეროვნულ ბანკს მთავრობა შეეშველებოდა ან გამოყენებული იქნებოდა სხვა გზები, ეროვნული ბანკი იძულებული არ გახდებოდა ამ გზისთვის მიემართა. დღეს გაიწირა ეკონომიკური ზრდა და დასაქმება ეროვნული ვალუტის გადასარჩენად", - განაცხადა რომან გოცირიძემ.
