"ეროვნული ვალუტის გაუფასურების შემთხვევაში, როცა ეროვნული ვალუტის კურსი 25% - მდე ეცემა, არის სავალუტო კრიზისი," - ამის შესახებ "რუსათავი 2"-ის ეთერში ეროვნული ბანკის ყოფილმა პრეზიდენტმა, ეკონომიკის ექსპერტმა, რომან გოცირიძემ განაცხადა.

გოცირიძემ ქვეყანაში მიმდინარე პროცესები მიკროინსულტს შეადარა და თქვა, რომ "ეროვნული ბანკი" ახლა იწყებს მკურნალობას. მისი მთავარი ამოცანა კი ფასები სტაბილურობაა.

ვალუტის გაუფასურებისას, რომან გოცირიძის განცხადებით, ყველაზე დიდი რისკი ფასების ზრდაა, ამიტომაც გოცირიძე "ეროვნული ბანკის" ნაბიჯებს სწორს უწოდებს.

"ქვეყანაში, სადაც იმპორტზე ვართ დამოკიდებული და დოლარიზებულია ჩვენი ეკონომიკა, ეროვნული ვალუტის გაუფასურება აუცილებლად გამოიწვევს ფასების ზრდას. ბედმა გაგვიღიმა, რომ საგარეო პროცესები ჩვენთვის სასიკეთოდ ვითარდება, როგორიცაა ნავთობის გაიაფება და ევროს გაუფასურება. ეს პროცესები რომ არ ყოფილიყო, ჩვენ უფრო მძიმე ვითარებაში აღმოვჩნდებოდით," - აცხადებს რომან გოცირიძე.