"საერთაშორისო გამჭვირვალობა - საქართველო" შინაგან საქმეთა სამინისტროს მოუწოდებს, დღეს ზუგდიდში "ნაციონალური მოძრაობის" პრაიმერისის პარალელურად გამართულ აქციაზე მომხდარი ინციდენტების შესახებ დროულად მოახდინოს სამართლებრივი რეაგირება.
"პოლიციამ ვერ შეძლო ფიზიკური შეურაცხყოფის აღკვეთა. ამასთან, ამ დრომდე პოლიციას არ დაუკავებია ის პირები, რომლებიც ძალადობრივი გზით ხელს უშლიდნენ პოლიტიკური ღონისძიების მშვიდ გარემოში ჩატარებას," -ამის შესახებ „საერთაშორისო გამჭვირვალობა საქართველოს" მიერ გავრცელებულ განცხადებაშია ნათქვამი.
განცხადებაში აღნიშნულია, რომ ზუგდიდში, „ნაციონალური მოძრაობის" მორიგი პრაიმერი ფიზიკური და სიტყვიერი შეურაცხყოფის ფონზე მიმდინარეობდა. ღონისძიების დაწყებამდე „ნაციონალური მოძრაობის" მოწინააღმდეგეებმა ზუგდიდის, შალვა დადიანის სახელობის თეატრის წინ მიმდებარე ტერიტორია გადაკეტეს. მათ წყლით სავსე ბოთლები და ცოცხები „ნაციონალური მოძრაობის" ლიდერების მანქანებს დაუშინეს. პარტიის წარმომადგენლების თქმით, აქციის მონაწილეები მათი მიმართულებით ქვებსაც ისროდნენ. დემონსტრანტები ასევე შეეცადნენ, კორდონი გაერღვიათ, თეატრის შენობაში შესულიყვნენ და პრაიმერი ჩაეშალათ.
აღსანიშნავია, რომ ადგილზე მობილიზებულმა სამართალდამცველებმა სპეციალური კორდონის მოწყობა უზრუნველყვეს, რის შედეგადაც პრაიმერის მონაწილეთა და დელეგატთა შენობაში შესვლა შესაძლებელი გახდა, მაგრამ პოლიციამ ფიზიკური შეურაცხყოფის აღკვეთა ვერ შეძლო. ამ დრომდე პოლიციას არ დაუკავებია ის პირები, რომლებიც ძალადობრივი გზით პოლიტიკური ღონისძიების მშვიდ გარემოში ჩატარებას ხელს უშლიდნენ.
„საერთაშორისო გამჭვირვალობა - საქართველო" შინაგან საქმეთა სამინისტროს მოუწოდებს, მომხდარ ფაქტებზე დროულად მოახდინოს სამართლებრივი რეაგირება და „ნაციონალური მოძრაობის" პრაიმერის უსაფრთხო გარემოში ჩატარება მაქსიმალურად უზრუნველყოს.
„საერთაშორისო გამჭვირვალობა - საქართველო" ზუგდიდში მიმდინარე პრაიმერს და თეატრის ტერიტორიაზე საპროტესტო შეკრებას აკვირდება. ორგანიზაციის დამკვირვებელთა თქმით, საპროტესტო აქციის მონაწილეები თეატრის მიმდებარე ტერიტორიაზე ამ დრომდე რჩებიან.
