გაზეთ „ასავალ-დასავალში" დაბეჭდილი წერილი სათაურით „ამოიღეთ სამართალი კუბოდან!"ყოფილი უზენაესი სასამართლოს თავმჯდომარის კოტე კუბლაშვილის საქმიანობას ეხება. ჟურნალისტი იმ მიზეზებზე საუბრობს, თუ რატომ იმსახურებს კუბლაშვილი თავისუფლების აღკვეთას.
„კუბლაშვილის „საქმენი საგმირონი" მთლად თავზე საყარია:
საქართველოს პარლამენტმა 2012 წლის მიწურულს 200 ადამიანი რომ პოლიტპატიმრად გამოაცხადა, ხომ ვერ მეტყვიან „ურწმუნო თომები", ვინ გაამწესა ისინი პოლიტიკური მოტივით ციხეში, თუ არა კუბლაშვილის სასამართლომ?!
დიახ, სწორედ კოტე კუბლაშვილია დამნაშავე, რომ მისმა სასამართლომ, სულ მცირე, 200 ადამიანი პოლიტპატიმრად აქცია!
დიახ, სწორედ კოტე კუბლაშვილია დამნაშავე, რომ სააკაშვილის მიერ გამოცხადებული, დანაშაულებრივი „ნულოვანი ტოლერანტობის" პოლიტიკის აღსრულების გამო, საქართველო ევროპაში პირველ ადგილზე გავიდა პატიმრების რაოდენობით!
პროკურატურაში ათასობით საჩივარი რომ არის შესული უკანონოდ წართმეული ქონების დაბრუნების მითხოვნით, ესეც კოტე კუბლაშვილის კისერზეა, რადგან სწორედ კუბლაშვილის სასამართლოს ჰქონდა „კონვეიერზე შეყენებული" ე.წ. საპროცესო გარიგების სისტემა, რომლითაც ადამიანებს ტერორის ქვეშ აიძულებდნენ, უარი ეთქვათ, საერთო ჯამში, მრავალასეულ მილიონიან საკუთრებაზე!
და აღარაფერს ვამბობთ თბილისის ცენტრში, ბუკიას ბაღთან მდებარე კუბლაშვილის ავადსახსენებელ სასახლეზე, რომლის დაუფლებასაც წინა მფლობელის ერთობ საეჭვო ვითარებაში გარდაცვალება უკავშირდება!
მოკლედ, კოტე კუბლაშვილი სააკაშვილის სისხლიანი რეჟიმის ერთ-ერთი ყველაზე გამორჩეული დამნაშავეა, რომელიც პირდაპირ იხვეწება, ვირის აბანოში მიმაბრძანეთო!- წერს გაზეთი.
(მოამზადა ნინი მოდრეკილმა)
