სამხრეთ ოსეთის დეფაქტო ხელისუფლების საგარეო საქმეთა სამინისტრო საქართველოს პრეზიდენტის, გიორგი მარგველაშვილის იმ განცხადებას პასუხობს, რომელშიც პრეზიდენტმა საქართველოს დეოკუპაციაზე გაამახვილა ყურადღება.
„მსგავსი განცხადებების მთავარი ადრესატი ყოველთვის დასავლური აუდიტორია იყო. რათა დასავლეთის სამყარო დაარწმუნონ, რომ საქართველო რეგიონში დემოკრატიის შუქურაა, რომელსაც მასშტაბური მხარდაჭერა სჭირდება",- ნათქვამია ე.წ. სამინისტროს განცხადებაში. ამავე ინფორმაციაში აღნიშნულია, რომ სამხრეთ ოსეთი არასოდეს დაივიწყებს და არ აპატიებს ქართულ მხარეს 2008 წელს სამხრეთ ოსეთში განხორციელებულ გენოციდს, ეთნიკურ წმენდასა და ცხინვალის დაბომბვას.
„საქართველოს მიერ სამხრეთ ოსეთში განხორციელებული დანაშაულებრივი ქმედების გამო, პასუხი არავის უგია. უფრო მეტიც, თბილისი კატეგორიულ უარს ამბობს, ხელი მოაწეროს ცხინვალისა და აფხაზეთის წინააღმდეგ ძალის გამოუყენებლობის შესახებ დოკუმენტს და რევანშისტული ამბიციების განსახორციელებლად საკუთარი სამხედრო პოტენციალის გაზრდას განაგრძობს, რათა, ხელსაყრელი მომენტის შემთხვევაში, ოსეთის ტერიტორია დაიკავოს",- ნათქვამია განცხადებაში.
პრეზიდენტმა 31 მარტს პარლამენტში სიტყვით გამოსვლისას ქვეყნის ტერიტორიული მთლიანობის აღდგენაზე, აფხაზეთისა და ცხინვალის დეოკუპაციის აუცილებლობაზე ისაუბრა. მისივე თქმით, ერთიანი საქართველოს სივრცეში, აფხაზებისა და ოსების პოლიტიკური და კულტურული უფლებების რეალიზების შენარჩუნება უნდა მოხდეს.
(მოამზადა ნინი მოდრეკილმა)
