გიორგი მამაცაშვილი:  სააკაშვილი არ ნანობდა ამ ბრძანების გაცემას და მეტიც,- მომავალშიც ანალოგიური ქმედებით იმუქრებოდა!

მედიაჰოლდინგ „რეპორტიორის"გენერალურმა დირექტორმა, გიორგი მამაცაშვილმა, პრეზიდენტის გუშინდელ განცხადებას,  26 მაისის მიტინგის დარბევასთან დაკავშირებით, პროვოკაცია უწოდა.

„26 მაისის თემა ყველა ჩვენგანს შავ ლაქად გვამჩნევია. სააკაშვილის რეჟიმის პირობებში შევიტანეთ სარჩელი,  თუმცა ჩვენი ხმა მაშინ დარჩა  „ხმად მაღაღადებლისად  უდაბნოსა შინა"...  ხოლო მისი უკანასკნელი განცხადება იყო გაგრძელება მისი იმ ხმამაღალი განცხადებისა, რომელიც უკრაინულ გამოცემას  2011 წლის სექტემბერში მისცა.  მაშინ სააკაშვილი  აღიარებდა, რომ  26 მაისის მიტინგის დაშლის ბრძანება თავად გასცა! (საზოგადოების უმრავლესობის შეფასებით კი, ეს იყო არა დაშლა, არამედ - შეგნებულად და გამიზნულად მოწყობილი სასაკლაო!),  ხოლო  ამ დარბევის უშუალო შემსრულებელი  და განმხორციელებელი გახლდათ - მერაბიშვილი (მისდამი დაქვემდებარებულ სპეცრაზმელებთან ერთად!). სააკაშვილი არ ნანობდა ამ ბრძანების გაცემას და მეტიც, - მომავალშიც ანალოგიური ქმედებით იმუქრებოდა..."

გიორგი მამაცაშვილმა, მიხეილ სააკაშვილის განცხადების გამო, 2011 წლის 26 მაისის აქციაზე, მასთან ერთად დაშავებულ ბექა სივსივაძესთან ერთად, ამერიკის შეერთებული შტატების ელჩის რიჩარდ ნორლანდის პრეს-მდივანს მიმართა. მას სურს, ამერიკის საელჩომ ოფიციალური განმარტება გააკეთოს საქართველოს პრეზიდენტის განცხადებასთან და 26 მაისის დარბევაში  FBI-ს თანამონაწილეობის შესახებ.

„მე  ველაპარაკე რიჩარდ ნორლანდის პრეს-მდივანს, ქალბატონ ნანას და გადავწყვიტეთ ოფიციალურად მივმართოთ ამერიკის საელჩოს.  მოვითხოვთ პასუხს კითხვაზე:   26 მაისის დარბევა და სასაკლაოს მოწყობა, ჟურნალისტებისა და კონკრეტულად ჩვენს მიმართ წარმოებული ძალადობა ამერიკის საელჩოს ან FBI-ის მხრიდან იყო თუ არა ნებადართული? მინდა მჯეროდეს,რომ ამერიკის მხარე ცალკე მოსთხოვს პასუხს მიხეილ სააკაშვილს ამ უაზრო  და პროვოკაციული განცხადების გამო..."