ბათუმის მერმა, ჯემალ ანანიძემ, შტორმის შედეგად დაზიანებული ბათუმის ახალი ბულვარის ტერიტორია დაათვალიერა.
"შტორმული შემოტევა კვლავ გრძელდება. ძირითადი ზიანი მიადგა ბათუმის ზღვისპირა ზოლს. მოსახლეობა არ დაზარალებულა, თუმცა, ზღვასთან ახლოს მდებარე კაფეებსა და რესტორნებს სერიოზული ზიანი მიადგა. რაც შეეხება ბულვარის ინფრასტრუქტურას, მწყობრიდან გამოვიდა განათების სისტემა, დაზიანდა სკამები და ბილიკები. გარკვეულ ნაწილში ზღვამ საფეხმავლო ბილიკებს ძირი გამოურეცხა და სერიოზულად დააზიანა. ზარალი ალბათ, მილიონ ლარზე მეტი იქნება, მაგრამ მთლიანად გამაგრებითი სამუშაოების და აუცილებელი ღონისძიებების ჩათვლით, არ არის გამორიცხული რამდენიმე მილიონზე გავიდეს, ოღონდ ამას დაპროექტების შემდგომ დავადგენთ" - განაცხადა ანანიძემ.
შეგახსენებთ, რომ ხუთბალიანმა შტორმმა აჭარის ზღვისპირა ზოლი დატბორა და ინფრასტრუქტურა დააზიანა.
