„მინისტრები ისეთ გამოსავალს ვერც იპოვიან, ეს პროცესი რომ შეაჩერონ, მაგრამ პროცესების გადავადება შეუძლიათ, გარკვეული პერიოდის განმავლობაში, სანამ გრძელვადიან გეგმას შეიმუშავებენ. უნდა გამოიყენონ კომბინაცია – ფინანსური ინსტიტუტების და ეკონომიკური აქტივობის გაზრდის მაქსიმალურად სწრაფი მექანიზმები. სხვა შანსი არ არის!“- ამ განცხადებას საქართველოს განვითარების კვლევითი ინსტიტუტის დამფუძნებელი გია ხუხაშვილი „რეპორტიორთან“ საუბრისას ეროვნულ ვალუტაზე საუბრისას აკეთებს.
„სიტუაციის გამოსწორება შეიძლება სავალუტო ბირჟაზე მეტი ვალუტის შესვლით, თუმცა, ამის ეკონომიკური საფუძვლები არ ჩანს. შესაძლებელია, ეროვნულმა ბანკმა და ფინანსთა სამინისტრომ სხვადასხვა მექანიზმებით, გარკვეული პერიოდით შეარბილონ ეფექტი და შეაჩერონ, მაგრამ მათი რესურსი ამ მხრივაც შეზღუდულია.
დღეს ისეთი სიტუაციაა – ეროვნული ბანკი, ფინანსთა და ეკონომიკის სამინისტროები ერთ კაბინეტში უნდა ისხდნენ და 24-საათიან რეჟიმში უნდა ეძებდნენ გამოსავალს. გამოსავლის პოვნა არ არის ადვილი, მაგრამ მაქსიმალურად უნდა შეეცადონ, რომ პროცესს თუ ვერ გააჩერებენ, მაქსიმალურად შეარბილონ მაინც“,- აცხადებს ხუხაშვილი.
