„დღეს, ისეთი სიტუაციაა – ეროვნული ბანკი, ფინანსთა და ეკონომიკის სამინისტროები ერთ კაბინეტში უნდა ისხდნენ და 24-საათიან რეჟიმში უნდა ეძებდნენ გამოსავალს. გამოსავლის პოვნა არ არის ადვილი, მაგრამ მაქსიმალურად უნდა შეეცადონ, რომ პროცესს თუ ვერ გააჩერებენ, მაქსიმალურად შეარბილონ მაინც!“- ამ განცხადებას საქართველოს განვითარების კვლევითი ინსტიტუტის დამფუძნებელი გია ხუხაშვილი „რეპორტიორთან“ საუბრისას აკეთებს.
„ეროვნულ ვალუტასთან მიმართებაში, რთულია ოპტიმისტური პროგნოზის გაკეთება. ლარის სტაბილიზაციის მოკლევადიანი საფუძველი, სამწუხაროდ, არ არსებობს. მცირე პრივატიზაცია გარკვეულ ბალიშად შესაძლოა ჩაეფინოს, მაგრამ რადგან ლარის კურსი დგინდება მოთხოვნა-მიწოდებას შორის თანაფარდობიდან გამომდინარე, ჩვენ ვხედავთ, რომ სავალუტო ბირჟაზე მოთხოვნა-მიწოდებას შორის არის სერიოზული დისბალანსი და მისი შევსების არანაირი ეკონომიკური ფაქტორი არ არსებობს – არც პირდაპირი ინვესტიციების სახით და არც ექსპორტიდან სავალუტო შემოდინების სახით, უახლოეს პერიოდში ტურისტულ ბუმსაც არ ველით. ნაღდი ვალუტის გადმორიცხვები შემცირებულია, ფაქტობრივად, მოთხოვნა ბაზარზე, მათ შორის იმპორტიორების მხრიდან, ჩვენ ხომ იმპორტდამოკიდებული ქვეყანა ვართ, ბევრად აჭარბებს ბაზარზე ვალუტის მიწოდებას. ასეთ ვითარებაში, ვალუტა თავისთავად არის მზარდი“,- განაცხადა გია ხუხაშვილმა.
გია ხუხაშვილი შექმნილი სიტუაციიდან გამოსავალზეც საუბრობს.
„სიტუაციის გამოსწორება შეიძლება სავალუტო ბირჟაზე მეტი ვალუტის შესვლით, თუმცა, ამის ეკონომიკური საფუძვლები არ ჩანს. შესაძლებელია, ეროვნულმა ბანკმა და ფინანსთა სამინისტრომ სხვადასხვა მექანიზმებით, გარკვეული პერიოდით შეარბილონ ეფექტი და შეაჩერონ, მაგრამ მათი რესურსი ამ მხრივაც შეზღუდულია“,-აღნიშნავს ხუხაშვილი.
