მწერალი ჭაბუა ამირეჯიბი ხელნაწერთა ეროვნული ცენტრის შესახებ:
„ხელნაწერთა ეროვნული ცენტრი ქართული კულტურის განსაკუთრებული და ფასდაუდებელი საგანძურის შემცველია. აქ დაცული ყველი წიგნი, ყოველი კოლექცია თუ ცალკეული ხელნაწერი ჩვენი ერისა (და არა მარტო ჩვენი) განვლილი ცხოვრების, ჩვენი კულტურისა და ისტორიის ამსახველია და მეტად სათუთ მოვლასა და მოპყრობას საჭიროებს. ეს ყველაფერი უკლებლივ უნდა გადაეცეს ქართველთა მომავალ თაობებს და რაც მეტი დრო გავა, მით მეტი იქნება ყოველივე ამის მნიშვნელობა. ამიტომაც მოვალენი ვართ, პატივი მივაგოთ ამ ცენტრის დამაარსებელთა, განსაკუთრებით პროფესორ ილია აბულაძის და პირველ მოღვაწეთა ხსოვნას, ხოლო მადლობა მოვახსენოთ მათ, ვინც დღეს სიყვარულითა და რუდუნებით თავს დასტრიალებს უძვირფასეს ფოლიანტებს.
საგანგებო მადლობა ეკუთვნის ბატონ ბუბა კუდავას, ხელნაწერთა ეროვნული ცენტრის ხელმძღვანელს, ჭეშმარიტად მამულიშვილური ღვაწლისთვის!"
