„ ჩვენთან, რეალობაში ჟურნალისტობა მარტო „ნიუს-მეიქინგი" ჰგონიათ, მაგრამ ასე არაა", -აღნიშნა „კვირის 20/30"  წამყვანმა არჩილ გამზარდიამ, „რეპორტიორთან" ინტერვიუში. გამზარდიას თქმით, ერთ-ერთი მიზეზი, რის გამოც გადაცემის წამყვანად შეარჩიეს, მისი ანალიტიკური აზროვნება იყო.

„ანალიტიკური თოქ-შოუს „კვირის 20/30" ტელეწამყვანის შერჩევისას, აქცენტი გაკეთებული იმაზე იყო, რომ წამყვანი ანალიტიკოსი ყოფილიყო, ჟურნალისტ-წამყვანზე აქ საუბარი არ ყოფილა, რადგან ეს ანალიტიკური გადაცემაა. პირველი ესაა, რაც ამ თოქ-შოუს სჭირდებოდა. ჩვენთან, რეალობაში ჟურნალისტობა მარტო „ნიუს-მეიქინგი" ჰგონიათ, მაგრამ ასე არაა. მთავარია წამყვანის საკუთარი შეხედულებები, პოზიცია. ერთ-ერთი კრიტერიუმი, რომელსაც ვაკმაყოფილებდი, ეს იყო. ალბათ, დანარჩენი ჩემმა ბექგრაუნდმა განაპირობა, ასაკმაც - არც ზედმეტად ახალგაზრდა ვარ და პირიქით. შემოთავაზება მაშინდელი პროდიუსერისგან მივიღე. რაღაც სიტყვა მეთქმის საზოგადოებაში მიმდინარე პროცესებზე. ეს განსხვავებული სპეციფიკაა, რამაც დამაინტერესა, როდესაც ხარ საჯარო ადამიანი და შენი სათქმელი გაქვს საზოგადოებისთვის,  ამისთვის რაღაც ხერხებს ეძებ, ეს ერთ-ერთი შანსია", -აღნიშნა გამზარდიამ.