ცერემონიალს ვიცე-პრემიერი გიორგი კვირიკაშვილი, საქართველოს რეგიონული განვითარებისა და ინფრასტრუქტურის მინისტრი დავით ნარმანია, საავტომობილო გზების დეპარტამენტის თავმჯდომარე დავით შავლიაშვილი, აჭარის ავტონომიური რესპუბლიკის მთავრობის თავმჯდომარე არჩილ ხაბაძე, ჩინეთის ელჩი, თურქეთის ვიცე-კონსული, აზიის განვითარების ბანკის წარმომადგენლები და სხვა საპატიო სტუმრები დაესწრებიან.
აღმოსავლეთ-დასავლეთის ცენტრალური ავტომაგისტრალის ქობულეთის შემოვლითი გზის სიგრძე 12.4 კილომეტრია. აღნიშნული გზის ექსპლუატაციაში შესვლა მნიშვნელოვანია როგორც ტურიზმის განვითარებისათვის, ისე სატრანზიტო მიმოსვლისათვის. ქობულეთის გზის გახსნით განიტვირთება დაბა ქობულეთის საავტომობილო გზა, რაც ტურისტულ სეზონზე დამსვენებელთა პირობებს გააუმჯობესებს.
გარდა ამისა, ასევე, გაიოლდება სატრანზიტო მიმოსვლა. ოფიციალური მონაცემებით, ბოლო ექვსი თვის მანძილზე სარფის საბაჟო-გამშვები პუნქტი 4 მილიონზე მეტმა ფიზიკურმა პირმა, სატვირთო და მსუბუქმა მანქანამ, მოტოციკლმა და ავტობუსმა გადაკვეთა. ეს მონაცემებიც ადასტურებს, რომ ქობულეთის შემოვლითი გზის გახსნით კომფორტულად და უპრობლემოდ გადაადგილებას შეძლებენ როგორც ჩვენი თანამოქალაქეები, ისე ქვეყნის სტუმრები.
გახსნის ცერემონიალი დღეს 11:30 საათზე ქობულეთის შემოვლითი გზის დასაწყისში, სოფელ შეკვეთილთან დაიწყება.
