„რეპორტიორის" პრესკლუბში, "საქართველოს ახალგაზრდა კონსტიტუციონალისტთა ასოციაციის" პრეზიდენტმა, თორნიკე ჭეიშვილმა განაცხადა, რომ შესაძლოა საპრეზიდენტო არჩევნების დღეს ამომრჩევლთა დაბალი აქტივობის საფრთხე წარმოიშვას, ასევე მან ისაუბრა მომავალი პრეზიდენტის უფლებამოსილებაზე.
„საპრეზიდენტო არჩევნების დღეს ამომრჩეველთა დაბალი აქტივობის საფრთხეს ვხედავ. 27 ოქტომბრის არჩევნები თვისებრივად განსხვავებული დატვირთვის მატარებელია აქამდე ჩატარებული საპრეზიდენტო არჩევნებისგან, ვინაიდან საქართველოს მოქალაქეები, კონსტიტუციის ახალი რედაქციის თანახმად, მნიშვნელოვნად შეკვეცილი უფლებამოსილებების მქონდე პრეზიდენტს აირჩევენ. აღნიშნულის საპირისპიროდ საპრეზიდენტო კანდიდატთა გარკვეული ნაწილის მხრიდან წინასაარჩევნო დაპირებებში შეინისნება რიტორიკა, რომელიც არსებითად ცილდება ახალარჩეული პრეზიდენტის კომპეტენციებს. წინასაარჩევნო დაპირებების ფონზე, ამომრჩევლებისთვის შეიქმნა ბუნდოვანი სურათი, გაჩნდა პრეზიდენტის, როგორც კონსტიტუციური ორგანოს დისკრედიტაციის საშიშროება, რომელიც კიდევ უფრო გაამძაფრა კანდიდატთა უცვეულო სიმრავლემ და არასერიოზულმა განცხადებებმა." -განაცხადა ჭეიშვილმა.
