დეპუტატმა გოგა ხაჩიძემ პარლამენტში მარიხუანას დეკრიმინალიზაციის შესახებ კანონპროექტი დაარეგისტრირა. კანონპროექტის მიხედვით, გამომშრალი ან ნედლი მარიხუანას, კანაფისა და კანაფის ფისის მცირე ოდენობით, გასაღების გარეშე მოხმარებამ სისხლისსამართლებრივი პასუხისმგებლობა არ უნდა გამოიწვიოს.
ხაჩიძის მიერ მომზადებული საკანონმდებლო ცვლილება ასეთ რამეს გულისხმობს - სისხლის სამართლის კოდექსის 273-ე მუხლში ჩაიწერება, რომ „სისხლისსამართლებრივი პასუხისმგებლობისგან თავისუფლდება საქართველოს კანონის „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ" №1 დანართის №82-85 და N2 დანართის N92 პუნქტებით განსაზღვრული ნარკოტიკული საშუალების გასაღების მიზნის გარეშე, მცირე ოდენობით უკანონო შეძენა ან შენახვა, ან/და ექიმის დანიშნულების გარეშე მოხმარება".
კანონპროექტს საზოგადოებაში მომხრეც ბევრი ჰყავს და მოწინააღმდეგეც. სანამ ცნობილი გახდება,რა პოზიციას დაიკავებენ დეპუტატები, აკადემიკოს ელიზბარ ჯაველიძეს დავუკავშირდით და ამ და ქვეყანაში მიმდინარე სხვა მნიშვნელოვან საკითხებზე ვესაუბრეთ.
ელიზბარ ჯაველიძე, აკადამიკოსი:
- ისედაც დამძიმებულია გარემო - უზნეობა, გარყვნილება სუფევს ყოველმხრივ, არ არის სამშობლოს სიყვარული, უფროს-უმცროსის, დედის, მამის, ძმის, მეგობრის პატივისცემა. ადრე „ნაციონალები" ამაყობდნენ იმით, რომ მეგობრის მეუღლესთან „დადიოდნენ", ახლა GDS-ზე ვუყურებდი, ერთი ბლანჟეიანი ყმაწვილი ეკითხება სტუმარს - მეგობრის დასთან თუ გააბამ სექსუალურ კავშირსო და ეს მეორე პასუხობს - თუ თანახმა იქნება, რატომაც არაო... ამათ ჰგონიათ, რომ კარგ რამეზე საუბრობენ. ისედაც, საქართველოს ახალგაზრდობის უდიდესი ნაწილი აყოლილია ნარკოტიკების მოხმარებას, კახეთში, სადაც ღვინის სამეფოა, ნარკოტიკებს იყენებენ -ესაა დღევანდელობა!
მარიხუანა არის პირველი საფეხური, ამ საფეხურიდან უკვე მეორე საფეხურზე გადადიან - ეს არის უკვე „ნემსი". ჩემი აზრით, ასეთი კანონის მიღება დაუშვებელია და ის, რომ ეს კანონპროექტი გოგა ხაჩიძემ შეიტანა, სავსებით ბუნებრივია, იმიტომ, რომ მას არ აწუხებს ქვეყანა, რა დღეშია, მას „აწუხებს" ის ყმაწვილები, რომლებსაც ამ კანონით გულს მოულბობენ და არჩევნების დროს გამოიყვანენ.
- საზოგადოებას ძალიან ბევრი, უფრო პრობლემური საკითხი აწუხებს, ასევე ძალიან ბევრი მნიშვნელოვანი კანონპროექტია გადადებული გვერდზე. იმიზეზებენ - ბევრად უფრო მნიშვნელოვანი რამეებიაო განსახილველი.
- დღევანდელი პარლამენტი ჩემთვის გაუგებარია. მნიშვნელოვანი საკითხების ნაცვლად, პარლამენტში განსახილველად გაჰქონდათ ბუსუსებიანი პრეზერვატივების შესახებ კანონი, აი, ამაზე მსჯელობდნენ.
დღეს ხელისუფლებას უმეტესად წარმართავენ „რესპუბლიკელები", საკანონმდებლო ორგანოში - უსუფაშვილი, აღმასრულებელში - ხიდაშელი, კომიტეტის თავმჯდომარედ ლევან ბერძენიშვილი. იქით კიდევ ორი „რესპუბლიკელი" მინისტრი, აქეთ კორძაია და უზენაესი სასამართლოს თავმჯდომარე... გასაგებია უკვე ყველაფერი - ეს არის პოლიტიკური წარღვნა! პოლიტიკური იმპოტენცია! ამ ხალხმა გაიმარჯვა და გაიმარჯვა „ქართული ოცნების"დათმობით და გარე ძალების წყალობით.
- „ნაციონალური მოძრაობის" ირგლივ განვითარებულ მოვლენებს რა შეფასებას აძლევთ?
- ახალი სვლა დაიწყეს „ნაციონალებმა", ახალი თამაშია. ვითომ დაიშლებიან. ნახეთ, ვინ დატოვა პარტია.ეს არ იქნება დიდი დანაკლისი ამ პარტიისთვის. ისე, ეს ოთხი ადამიანი სხვებთან შედარებით, ნაკლებადცოდვილია. მგონია, რომ დასავლეთს უნდა, სააკაშვილის მერე ახალი სახეები შექმნას. მერე ამას დაარქმევენ ეროვნულ რაღაცას, სახელს მოიფიქრებენ. ასეთი რამეები იხარშება ბოკერიას ტვინში. ამიტომ ვამბობდით მეც და არაერთიც, მიხედეთ ბოკერიას და თარგამაძეს, მაგრამ არავინ არ გაინძრა. ბევრი უსიამოვნება კიდევ წინ გევლის.
- ბატონო ელიზბარ, ხელნაწერთა ეროვნული ცენტრის დირექტორად ზაზა აბაშიძე დაინიშნა. ამ ამბავს წინ ძალიან დაძაბული სიტუაცია უძღოდა, რომელიც ასე თუ ისე მინელდა.
- ზაზა აბაშიძე ჩემი მეგობარია. ეს ადამიანი ღირსეული კაცია, ღირსეული ქართველის შვილი, ნიჭიერი ადამიანია და წარმატებებს ვუსურვებ. რაც შეეხება ბუბა კუდავას, ვიცი, რომ ხელნაწერებში რომ მივიდა, წარმოდგენა არ ჰქონდა იქაურობაზე, ალბათ, მერე გაერკვა ყველაფერში. ეს არის ის საკითხი, რომელსაც მეცნიერებათა აკადემია უნდა წყვეტდეს.
- სწორედ მეცნიერებათა აკადემიამ გამოუცხადა ხელნაწერთა ეროვნული ცენტრის ყოფილ დირექტორს ბუბა კუდავას ღია მხარდაჭერა...
- ვინც მხარი დავუჭირეთ, იმ ადამიანებმა არ ვიცოდით, ვინ იყო მისი კონკურენტი, ეს იყო მიზეზი. ეს იყო უცებ წამოჭრილი საკითხი. პირადად მე არ ვიცნობ ბუბა კუდავას, არც მის ნამოღვაწარს ვიცნობ, არ ვიცნობ მის მეცნიერულ წერილებსაც. არ არის მეცნიერი, ესეც ვიცი, მაგრამ შესაძლოა, კარგი მენეჯერი იყო და კარგად მართავდა ხელნაწერთა ეროვნულ ცენტრს.
მე არ მომეწონა ის, რაც ხელნაწერთა ეროვნული ცენტრის თანამშრომლებმა დაატრიალეს, პოლიტიკური სუნი დააყენეს... მეცნიერი, პირველ რიგში, მეცნიერებით უნდა იყოს დაინტერესებული, ამის მერეა ყველაფერი. მიტინგობანა და რაღაცები არ არის საჭირო. მიტინგები მე მესმის სამართლიანობისთვის.
- რა იყო თქვენთვის მიუღებელი ხელნაწერთა ეროვნული ცენტრის თანამშრომლების აქტივობიდან იმ დღეებში?
- ყველა რომ გამოვიდა და ერთი ამბავი ატყდა, რა იყო ეს? ალბათ ის, რომ დემოკრატიაა შედარებით. მიხეილ სააკაშვილი ხალხს ხოცავდა ქუჩებში, ცოცხებით აუპატიურებდა ხალხს, მაშინ ხმას არავინ იღებდა, მეცნიერება რომ მოსპო და განადგურა სააკაშვილის ხელისუფლებამ, ყველა უნივერსიტეტი რომ დაიყვანა ნოლზე, ამის შესახებ მაშინ არც არასამთავრობები და არც ასეთი დაწესებულებები ხმას არ იღებდნენ. აი, ეს არის უბედურება, ეს არის სამშობლოს ღალატი!
