„მოვიყვანეთ და მეორე დღეს ჩვენს წინააღმდეგ წავიდა. რატომ - აუხსნელი თემაა", - ამ განცხადებას ექს-პრემიერი ბიძინა ივანიშვილი „გურიანიუსთან" ექსკლუზიურ ინტერვიუში გიორგი მარგველაშვილთან დაკავშირებით აკეთებს:
„არაკორექტული იყო მისი ქცევები. ამბობდა ერთს არჩევნებამდე, გააკეთა მეორე. გუნდი, რომელმაც ის მოიყვანა, ცდილობს, როგორმე დააზიანოს, როგორმე მათი საწინააღმდეგო გააკეთოს. კანონი წაკითხულიც არ აქვს, ისე ცდილობს, დაადოს რაღაცებს ვეტო. ამ თემაზე ერთ-ერთ გადაცემაში ბევრს ვისაუბრებ. რა უნდა და რატომ ხდება ეს, გაუგებარია. საუბრის ნაწილს, როცა საჭირო გახდება, გავასაჯაროვებ.
ვინ აკეთებს კვლევებს პრეზიდენტზე, ცალკე ანალიზის თემაა.
სააკაშვილის საქმეში ზოგიერთ მასალაზე გრიფი „საიდუმლო" უკანონოდ ჰქონდა დადებული და ეს იყო პრეზიდენტის პრეროგატივა, რომ მოეხსნა. სამჯერ მიმართა პროკურატურამ და სამჯერვე უარი უთხრა მარგველაშვილმა. მან კარგად იცოდა, რომ არასწორად იქცეოდა. ხელს უშლიდა გამოძიებას და იცავდა სააკაშვილს. უფლება ჰქონდა და გამოიყენა, ისევე როგორც ვეტოს უფლება აქვს. სადაც უნდა მოიქნევს და გამოიყენებს", - აცხადებს ივანიშვილი.
