ტელეკომპანია „იმედმა" არხზე საზოგადოებრივ- პოლიტიკური გადაცემებისა და თოქ-შოუების 2016 წლამდე დახურვის შესახებ განცხადება გაავრცელა.
„საშემოდგომო სატელევიზიო სეზონზე ტელეკომპანია იმედი დროებით აჩერებს საზოგადოებრივ-პოლიტიკური თოქ შოუების სეგმენტს.
ამის მიზეზია ჩვენი სურვილი შევცვალოდ არსებული გადაცემების ფორმატი და შევიმუშაოდ თვისობრივად ახალი სატელევიზიო პროდუქტი, რომელსაც შევთავაზებთ მაყურებელს 2016 წლიდან.
ამავე განცხადებაში დიდი მადლობა გვინდა გადავუხადოთ გადაცემების გუნდის წევრებს, რომელთაგან თითოეულს დიდი წვლილი აქვს შეტანილი იმედის საზოგადოებრივ-პოლიტიკური თოქ შოუების შექმნაში."- აღნიშნულია განცხადებაში.
„რეპორტიორი" გადაცემა „რეაქციის" რედაქციის წევრებს დაუკავშირდა, რომლებმაც დაგვიდასტურეს, რომ „რეაქცია" იმედის ეთერში მაუწყებლობას წყვეტს.
ამის შესახებ საუბრობს "ინტერპრესნიუსთან" "იმედის კვირის" წამყვანი, ჟურნალისტი შალვა რამიშვილი. მისი განცხადებით, არხის გადაწყვეტილების შესახებ ის ინფორმირებულია.
"მე ახლა შვებულებაში ვიმყოფები და დეტალები ჩემთვის ცნობილი არ არის, მაგრამ ორშაბათს გავიგებ ყველაფერს. რამდენადაც ვიცი, დახურვაზე არ არის საუბარი, თუმცა, უცნობია რა სახით გავა. შესაძლოა ამ ცვლილებებზე არხის განცხადებაც იყოს. მე, ეს ხელმძღვანელობამ შემატყობინა", - განაცხადა შალვა რამიშვილმა.
