ჟურნალისტი ბონდო მძინარაშვილი თოქ-შოუ „რეაქციის" წამყვანსა და ჟურნალისტს ინგა გრიგოლიას მხარდაჭერას უცხადებს. როგორც მძინარაშვილი თავის ფეისბუქის გვერდზე აღნიშნავს, ტელეკომპანია „იმედის" გადაწყვეტილება, არხზე საზოგადოებრივ- პოლიტიკური გადაცემების დახურვის შესახებ, შეიძლება შეცდომად ჩაითვალოს.
„ინგა გრიგოლია არის საქართველოში ყველაზე რეიტინგული ჟურნალისტი. მისი გადაცემების მიმართ ყოველთვის დიდი ინტერესი იყო და იქნება. მოსწონს ეს ვინმეს თუ არა, ამით რეალობა არ იცვლება. და რეიტინგული იქნება ნებისმიერ ტელეეთერში.
ვინმემ არ იფიქროს, რომ ამას მხოლოდ კოლეგიალობა და მეგობრობა მალაპარაკებს - ეს არის სრული სიმართლე და როცა ასეთ ჟურნალისტს (და ზოგადად ჟურნალისტს) ე.წ. დამსაქმებელი ამგვარი უტიფრობით შეურაცხყოფს, ეს მხოლოდ იმ პიროვნების კი არა, პროფესიის შეურაცხყოფაა. ახლა კი გვეუბნებიან, რომ მთელი გუნდი დაითხოვეს!
ამ ქვეყანაში ერთხელ და სამუდამოდ უნდა დამკვიდრდეს სტანდარტი - ადამიანმა მასთან დაკავშირებული გადაწყვეტილების შესახებ ტელეეთერით არ უნდა შეიტყოს!
სადაც იქნება, ინგა გრიგოლიას ყველგან გაჰყვება მაყურებელი იმიტომ, რომ ის ინგა გრიგოლიაა! ასე იყო, როდესაც გადაცემებს უხურავდნენ და შემდეგ სხვაგან ახალი ემოციებით მუხტავდა ხალხს!
ჩემო ძვირფასო!
შენ ვერავინ მოგერევა, რადგან შენ ინგა გრიგოლია ხარ!"- მიმართავს მძინარაშვილი გრიგოლიას.
