სადღეისოდ, საქართველოს ფეხბურთის ფედერაციის პრეზიდენტობის სურვილი ოთხ კანდიდატს აქვს გამოთქმული - ლევან კობიაშვილს, რევაზ არველაძეს, მამუკა კვარაცხელიასა და მერაბ ჟორდანიას.
კობიაშვილმა საკუთარი საარჩევნო კამპანიის დაწყების შესახებ დღეს, „დინამო არენაზე" განაცხადა: „ვერთვები საარჩევნო კამპანიაში და ორშაბათიდან ვიწყებ შეხვედრებს კლუბებთან, რეგიონულ ფედერაციებთან და ასოციაციებთან. ასევე, როგორც კანდიდატი, ჩემი ოფიციალური დარეგისტრირება მოხდება და ბოლოს მექნება შემაჯამებელი შეხვედრა ყველა თაობის ვეტერან ფეხბურთელთან. მე მინდა მათ იცოდნენ თუ რას ვაპირებ, რას გავაკეთებ ქართული ფეხბურთისთვის და როგორია ჩემი ხედვა, ზოგადად, ქართული ფეხბურთის უკეთესი მომავლისთვის. ასევე, სრულიად გახსნილი ვიქნები გულშემატკივრებისთვის, საზოგადოებისთვის, საფეხბურთო სამყაროსთვის და სრულიად საქართველოსთვის. ფეხბურთი არის ჩვენი ცხოვრება და ჩვენ ერთიანი ძალისხმევით შევძლებთ ქართული ფეხბურთისთვის უკეთესი მომავლის შექმნას".
საარჩევნო ხმის მქონე 35 დელეგატი საქართველოს ფეხბურთის ფედერაციის რიგით მეხუთე პრეზიდენტს 3 ოქტომბერს აირჩევს.
