თუ თქვენი შვილები ჟელეს დათუნიებს აღმერთებენ, შეგიძლიათ ისინი გაახაროთ! ახლა თქვენ თავად შეძლებთ დაამზადოთ ეს ნუგბარი და თანაც ისე, რომ თქვენი შვილები მათ მაღაზიაში ნაყიდისგან ვერ გაარჩევენ. ამასთან, შინ მომზადებულში გაცილებით ნაკლები ქიმია იქნება! უბრალო ინგრედიენტები და სავსებით მარტივი მომზადების წესი ამ ნუგბარს თქვენს საყვარელ ტკბილეულად აქცევს.

ჟელეს დათუნიების მოსამზადებლად თქვენ დაგჭირდებათ:

უფერო ჟელატინი;

მზა ნარევი სხვადასხვა გემოსა და არომატის ჟელესთვის;

სილიკონის ან პლასტმასის ფორმა;

ლიმონმჟავა ან შაქრის ფხვნილი მოსაყრელად;

მომზადება:

დადგით გაზქურაზე ქვაბი, ჩაასხით ნახევარი ჭიქა წყალი, ჩაყარეთ 2 ჩაის კოვზი ჟელატინი და 1 ულუფა ნარევი ჟელესთვის (85გ.). ურიეთ ნელ ცეცხლზე, სანამ ჟელატინი არ გაიხსნება.

ამის შემდეგ მიღებული მასა გადაიტანეთ კონტეინერში, საიდანაც არ გაგიჭირდებათ მისი ფორმებში გადასხმა.

გადაიტანეთ მასა ფორმებში და შედგით საყინულეში 15-20 წუთით.

იმის შემდეგ, რაც საყინულედან გამოიღებთ, შეგიძლიათ დათუნიებს მოასხათ ლიმონმჟავა ან მოაყაროთ შაქრის ფხვნილი.

წყარო: gemrielia.ge