კახეთში მცხოვრები გელა გრიშენკო ირწმუნებოდა, რომ ყურძნის დაბალი ფასის გამო ვაზის გაჩეხა გადაწყვიტა. მას შემდეგ რაც საკითხით ადგილობრივი ხელისუფლება დაინტერესდა, ბევრი სხვა საინტერესო დეტალი გამოიკვეთა.

კახეთის გუბერნატორი მევენახის მიერ ვაზის გაჩეხას პოლიტიზირებულ პროცესს უწოდებს. ირაკლი შიოლაშვილმა გურჯაანის რაიონის სოფელ კარდენახში გელა გრიშენკოს ვენახი პირადად მოინახულა. შიოლაშვილის ინფორმაციით, კახელმა მევენახემ გელა გრიშენკომ შეცდომაში შეიყვანა ჟურნალისტები. გუბერნატორის განცხადებით, ვენახი, რომელიც კამერების წინ აჩეხა, მისი საკუთრება არ არის და ის იმავე სოფლის მკვიდრს გოდერძი დოლენჯაშვილს ეკუთვნის, რომელმაც ძველი ვენახი ახალი ვაზის გაშენების მიზნით რამდენიმე დღის წინ გაჩეხა.

გუბერნატორის ინფორმაციით, გელა გრიშენკოს 75 მეასედზე გაშენებული აქვს ვენახი და მიღებული მოსავალი - 4 ტონა რქაწითელის ჯიშის ყუძენი 18 სექტემბერს ჭანდარის ღვინის ქარხანაში 70 თეთრად ჩააბარა.

აღსანიშნავია, რომ გრიშენკოს დედა „ერთიანი ნაციონალური მოძრაობის" აქტიური მხარდამჭერია, ნუნუ გრიშენკო აქტიურად მონაწილეობდა კახეთში გამართულ საპროტესტო აქციებში.

ის ასევე პარლამენტში, გურჯაანის რაიონის მაჟორიტარ დეპუტატთან ერთად იმყოფებოდა, ერთ-ერთ საკომიტეტო მოსმენაზე. ის ასევე მონაწილეობდა ტელეკომპანია „რუსთავი 2"-ს გადაცემა „არჩევანში", რომელიც კახეთში მიმდინარე საპროტესტო აქციებს ეძღვნებოდა.