გორის რაიონის სოფელ შინდისში, იმ ტერიტორიაზე, სადაც 2008 წლის აგვისტოს ომის დროს 17 ქართველი ჯარისკაცი გმირულად დაიღუპა, სრულიად საქართველოს კათოლიკოს-პატრიარქი ჩაბრძანდა.

უწმინდესმა და უნეტარესმა ილია მეორემ  ეკლესია  და ტერიტორია აკურთხა, მან ასევე სიტყვით მიმართა დამსწრე საზოგადოებას. სიტყვით წარსდგნენ მეუფე ანდრია და ვიცე-პრემიერი კახა კალაძე.

ღონისძიებას დაესწრნენ  წმინდა სინოდის წევრები, პარლამენტის დეპუტატები, ადგილობრივი მთავრობა, დაღუპული გმირების ოჯახების წევრები და ახლობლები.

პროექტ „შინდისის გმირების" ავტორი რუსთაველის თეატრის მსახიობი ედმონდ მინაშვილია. პროექტის ფარგლებში, საქველმოქმედო ფონდ „კალას" დაფინანსებით აშენდა წმინდა გიორგის სახელობის ტაძარი.  

ედმონდ მინაშვილის ორგანიზებით გადაღებულია დოკუმენტური ფილმი - „შინდისის გმირები". 17 გმირის სახელზე დაწყებულია ბრინჯაოს მონუმენტის აგება.

აღნიშნული ღონისძიების ორგანიზატორი და რეჟისორი პროექტ „შინდისის გმირების" ავტორი, მსახიობი ედმონდ მინაშვილია, რომელმაც საზოგადოებას დღეს  კიდევ ერთხელ მოუთხრო  შინდისის გმირების ისტორია.