XIX საუკუნის რუსი მხატვრის ივან კრამსკოის ერთ-ერთი ცნობილი ნახატია „უცნობი"; ამ სურათზე მრავალი ჭორ-მართალი გავრცელდა, ყველას აინტერესებდა ვინ იყო ნახატზე გამოსახული ქალის პროტოტიპი. თავად ავტორი არაფერს ამბობდა და გამოცანად დაუტოვა შთამომავლობას. ერთნი ფიქრობდნენ, რომ ეს, იმ პერიოდში გამოქვეყნებული რომანის „ანა კარენინას" გავლენით შეიქმნა, მეორენი დოსტოევსკის „იდიოტის" პერსონაჟ ნასტასია ფილიპოვნას ადარებენ; თუმცა, მკვლევართა უმეტესობა ფიქრობს, რომ ნახატს რეალური პროტოტიპი ჰყავდა. არის ვერსია, რომ მხატვარს მისი ქალიშვილი სოფია კრამსკაია პოზირებდა, მოგვიანებით შექმნილი ქალიშვილის პორტრეტში „გოგონა და კატა" მართლაც შეიძლება მსგავსების აღმოჩენა.

არსებობს კიდევ ერთი აზრი, რომელიც ეკუთვნის იგორ ობელენსკის: იგი ამტკიცებს, რომ „უცნობის" პროტოტიპი ქართველი თავადის ასული ბარბალე თურქესტანიშვილია, იმპერატრიცა მარია ფიოდოროვნას ფრეილინა და ალექსანდრე I-ის ფავორიტი, რომელსაც ქალიშვილიც გაუჩინა. გოგონას დაბადების შემდეგ იმპერატორმა დედა-შვილის მიმართ ინტერესი დაკარგა, ხოლო ბარბალემ თავი ჩამოიხრჩო. 1880 წელს კრამსკოის უნახავს პორტრეტი, რომელზეც ქართველი ფრეილინა იმპერატორის ნაჩუქარი კამეით იყო გამოსახული, მასზე დიდი შთაბეჭდილება მოუხდენია ქალის სილამაზესა და ტრაგიკულ ბედს და გადაუწყვეტია მისი პორტრეტი შეექმნა. თუმცა, ყველა ეს ვერსია ვარაუდის დონეზე რჩება, ხოლო „უცნობის" სახელი კი იდუმალებითაა მოცული.