„რუსთავი 2"-ის ირგვლივ შექმნილ პროცესებს „ახალგაზრდული ცენტრის" ერთ-ერთი ლიდერი გიორგი ჩიქოვანი „რეპორტიორთან" აფასებს:
„ბოლო პერიოდში აქტიურად განიხილება „რუსთავი 2"-ის სამართლებრივი საქმე, გარკვეულ ჯგუფებს სურთ, ეს სამართლებრივი დავა პოლიტიკურ ჭრილში გადაიყვანონ და როგორმე დააკავშირონ საქართველოს ყოფილი პრემიერ-მინისტრის ბატონი ბიძინა ივანიშვილის სახელთან.
გვსურს, საზოგადოებას შევახსენოთ, რომ ბატონ ბიძინას ჰქონდა საკუთარი ტელევიზია „მე-9 არხი", რომელიც მან საკუთარი ინიციატივით დახურა, რადგან არ სურდა, საზოგადოებაში ყოფილიყო განცდა, რომ ის ამ არხს საკუთრი პოლიტიკური მიზნებისთვის იყენებდა. როგორც მან აღნიშნა, ტელევიზიის საკუთრებაში არსებობა სამართლებრივი ფორმით კანონთან არანაირ შეუსაბამობაში არ მოდიოდა. მაგრამ პირადი აზრი იყო, რომ ქვეყნის პირველ პირს არ შეიძლება ჰქონდეს საკუთარი ტელევიზია, ეს მისთვის დისკომფორტის შემქმნელი იყო. სწორედ ამიტომ მან მიიღო გადაწყვეტილება და 2013 წლის 1 სექტემბერს შეაჩერა ტელეკომპანიის მაუწყებლობა. ის დღესაც იმავე პოზიციაზეა და თვლის, რომ არ შეიძლება არსებობდეს სახელისუფლებო მიკეძოებული ტელევიზია. უფრო მეტიც - ის სრულად იზიარებს აზრს, რომ ტელევიზია ეს არის დემოკრატიის არსებობისათვის ერთ-ერთი უმთვრესი წყარო. სწორედ ამიტომ თითიდან გამოწოვილია მოსაზრება, რომ თითქოს მას სურს „რუსთავი 2"-ის ხელში ჩაგდება. დამეთანხმებით, მას გააჩნდა უდიდესი რესურსი, რომ უბრალოდ კონკურენციის ფორმით სრულად გაეძევებინა ბაზრიდან „რუსთავი 2", მაგრამ ის ასე არ მოიქცა. მისთვის მთავარი სიტყვის თავისუფლებაა, რომელიც დამოუკიდებელი მასმედიის გარეშე წარმოუდგენელია.
მიგვაჩნია, რომ ამ საქმესთან ბატონი ბიძინა ივანიშვილის დაკავშირება არის გაუმართლებელი, რაც ემსახურება კონკრეტულად მის დისკრედიტაციას და საქართველოს იმიჯის შელახვას საერთაშორისო ასპარეზზე.
კიდევ ერთხელ მოვუწოდებთ „რუსთავი 2"-ს და მის მომხრეებს, ნუ ცდილობთ, ჩაერიოთ სასამართლოს საქმეებში, მის დამოუკიდებლობაში. პატივი ვცეთ სახელმწიფოს მთავარ სამართლებრივ ორგანოს და შევწყვიტოთ მასზე ზეწოლა, რადგან როგორც დემოკრატია არ არსებობს თავისუფალი სიტყვის გარეშე, ასევე სახელმწიფოს არსებობა შეუძლებელია დამოუკიდებელი სასამართლოს გარეშე. თქვენ კი სწორედ მისი დამოუკიდებლობის დაკარგვა გსურთ", - აცხადებს გიორგი ჩიქოვანი.
