„მინდა, პასუხი გავცე საზოგადოებაში გაჩენილ კითხვებს", - ასე დაიწყო „პირველი არხის" საინფორმაციო სამსახურის უფროსმა გიორგი გვიმრაძემ სპეციალური ბრიფინგი, რომელიც ბოლო პერიოდში მისი მისამართით გაჟღერებულ კითხვებთან დაკავშირებით გამართა. მედიაში გავრცელებული ინფორმაციით, გიორგი გვიმრაძე ევრაზიული არჩევანის ლიდერთან არჩილ ჭყოიძესთან ერთად სომხეთში ევრაზიული კავშირის მიერ ორგანიზებულ კონფერენციას დაესწრო. გვიმრაძის განმარტებით, ის ბოლო წლების განმავლობაში დაკავებული იყო ანალიტიკური საქმიანობით და მას ხშირად უხდებოდა სხვადასხვა პოზიციის მქონე, ზოგჯერ მისთვის მიუღებელი პოზიციის მქონე ადამიანებთან ურთიერთობა.
„მინდა, გითხრათ, რომ ბოლო წლების განმავლობაში დაკავებული ვიყავი ანალიტიკური საქმიანობით სტრატეგიულ გამოკვლევათა ცენტრში, რაც გულისხმობდა იმას, რომ მიწევდა და ვმონაწილეობდი სხვადასხვა ფორმატის ღონისძიებებში. ურთიერთობა მქონდა სხვადასხვა პოზიციის, ზოგჯერ, ჩემთვის კატეგორიულად მიუღებელი პოზიციის ადამიანებთან. დიახ, ვმონაწილეობდი სომხეთში გამართულ ღონისძიებაში, რომელიც ეძღვნებოდა პოსტსაბჭოთა სივრცეში ინტეგრაციულ პროექტებს და ჩემი მოხსენება ხაზგასმით ეხებოდა ევროპული არჩევანის უალტერნატივობას. მეორე, რაც შეეხება რუსეთ-საქართველოს ურთიერთობებს, ამ ფორმაციის რუსეთის ფედერაციასთან, მე მგონია, რომ საქართველოს ურთიერთობების მოწესრიგება არის შეუძლებელი. თუმცა, ვადასტურებ, რომ ახალგაზრდული, სამოქალაქო დიალოგის პროცესებში ვიყავი ჩართული და დიალოგი არის შესაძლებლობა, რომ რუსეთიდან მომდინარე საფრთხეების ნეიტრალიზება მოხერხდეს. და ბოლოს, ასევე მინდა გითხრათ, ჩვენ გვაქვს გაფორმებული ურთიერთობა ბრიტანეთში დაფუძნებულ საკონსულტაციო ორგანიზაციასთან, რომელიც 26 ოქტომბერს ჩამოვა საქართველოში და ჩვენ დავიწყებთ ევროპული ტიპის, ინტეგრირებული, მულტიმედიური საინფორმაციო სამსახურის ჩამოყალიბებას, რაც მოგვცემს უფრო მეტად მიუკერძოებელი და ობიექტური საინფორმაციო საქმიანობის წარმოების გარანტიას", - განაცხადა გიორგი გვიმრაძემ.
