საპარლამენრო უმრავლესობის წევრი ეკა ბესელია „რუსთავი 2"-ის საქმეზე საუბრობს და აცხადებს, რომ ხელისუფლება პროცესებში არ ერევა. ამის შესახებ ბესელიამ  „რუსთავი 2"-ის ეთერში განაცხადა და აქვე დასძინა, რომ მოსამართლე თამაზ ურთმელიძის გადაწყვეტილება არხის სარედაქციო დამოუკიდებლობასთან არავითარ კავშირში არ არის. 

„კონსტიტუციაში წერია, რომ ვერცერთ მოსამართლეს ვერ მოსთხოვ ანგარიშს ვერცერთ კონკრეტულ საქმეზე. ვერც „ნაციონალური მოძრაობა" და ვერც ვერავინ ვერ აღუდგება წინ სასამართლოს გადაწყვეტილებას და ვერ შეცვლის მას გარდა ისევ სასამართლო ინსტანციისა. ეს არის კონსტიტუციური დათქმა. რომელ კონსტიტუციურ წესრიგზე გვესაუბრებიან ეს ბატონები, როდესაც გვეუბნებიან, რომ ჩაიდენენ დანაშაულს და არ აღასრულებენ სასამართლო გადაწყვეტილებას?

მოსამართლის გადაწყვეტილება არავითარ კავშირში არ არის „რუსთავი 2"-ის სარედაქციო დამოუკიდებლობასთან. სტანდარტი, რომელიც არის აღებული კონკრეტული პრეცედენტული გადაწყვეტილებებიდან, ეს არის ის პრეცედენტები, რომლებსაც იყენებს ყველა თანამედროვე ტიპის სასამართლო, იმისთვის, რომ განსაზღვროს რა არის თავისუფლების ხარისხი და ის უფლება, რასაც ჰქვია, რომ საზოგადოებამ მიიღის ობიექტური ინფორმაცია.

თუ სიტყვის თავისუფლება მართლაც არის შესაძლებელი დაიბრუნოს „რუსთავი 2"-მა ძალიან დიდი ხნის მერე, დღეს ამის შანსი აქვს. „რუსთავი 2" არასდროს არ იყო თავისუფალი, იმიტომ, რომ მთელი წლები ის ემსახურებოდა ერთ პოლიტიკურ გუნდს.

ხელისუფლება არ ერევა ამ პროცესებში. ხელისუფლება არ უნდა ჩაერიოს კერძო სამართლებრივ დავაში. ასევე, მინდა ხაზგასმით ვთქვა, რომ მოსამართლის გადაწყვეტილება ღამით არ გამოსულა. მოსამართლემ გამოიყენა ნორმა რომელიც არსებობს და მოქმედებს. ამიტომ იმაზე საუბარი, რომ ვინმეს არ მოსწონს ურთმელიძის გადაწყვეტილება და არ დაემორჩილება, უკაცრავად მაგრამ, მე პირადად მიმაჩნდა, რომ ჩემი ოჯახის წევრები უკანონოდ დაატყვევა მოსამართლის გადაწყვეტილებით ხელისუფლებამ, რა მექნა ციხე უნდა ამეღო თუ სასამართლოს შენობა უნდა ამეღო?!" - განაცხადა ეკა ბესელიამ.