„არის მცდელობა, რომ როგორმე მოხდეს ხელისუფლების ჩართვა „რუსთავი 2"-ის გარშემო არსებულ პროცესებში", - ამის შესახებ საპარლამენტო უმრავლესობის წევრი თამაზ მეჭიაური აცხადებს და აქვე განმარტავს, რომ ხელისუფლება აღნიშნულ პროცესებს ემიჯნება. ამის შესახებ მეჭიაურმა გადაცემა „არჩევანში" საუბრისას განაცხადა.

„ეს არ არის ბრძოლა „რუსთავი 2"-ის წინააღმდეგ. აქ არის ბრძოლა სამართლებრივი გზით ყოფილ და ახლანდელ მფლობელებს შორის, რომელიც გარდამავალი უპირატესობით მიმდინარეობს. ხან ერთი მხარეა კმაყოფილი, ხან მეორე. ეს ბუნებრივია და მივესალმებით, იმდენად, რამდენადაც ყველაფერი მიმდინარეობს სამართლებრივ სივრცეში, განსხვავებით 8 წლის წინანდელი მოვლენებისგან, როდესაც ნიღბებით თუ უნიღბოდ ხდებოდა შეჭრა ტელევიზიებში და ხდებოდა იძულებით გადაფორმება და ა.შ. ყოველივე ამის შემდეგ სამართლებრივი ბრძოლა, რა თქმა უნდა, მისაღებია. ჩემი აზრით, არის მცდელობა, რომ როგორმე მოხდეს ხელისუფლების ჩართვა ამ პროცესში, რასაც ხელისუფლება ემინჯება", - განაცხადა მეჭიაურმა.