„ახალი მემარჯვენეების" პოლიტიკური მდივანი მანანა ნაჭყებია ხელისუფლებისგან საარჩევნო სისტემის ცვლილებას ითხოვს და აცხადებს, რომ აღნიშნული ცვლილების განსახორციელებლად „ქართულ ოცნებას" კიდევ 10 თვე აქვს და ეს სრულიად საკმარისი დროა.
ამ და პოლიტიკურად მნიშვნელოვან სხვა საკითხებზე მანანა ნაჭყებია „რეპორტიორს" ესაუბრა:
- გუშინ საქართველოს საპარლამენტო უმრავლესობამ ჩააგდო „თავისუფალი დემოკრატების" ინიციატივა, რომელიც გულისხმობდა საარჩევნო გარემოსა და საარჩევნო სისტემის შეცვლისთვის ინტერპარტიული ჯგუფის შექმნას, რომელიც იმუშავებდა საქართველოს პარლამენტში შემავალ პოლიტიკურ პარტიებთან ერთად და დაიწყებოდა დიალოგი, რომელიც, მგონი, უკვე დაგვიანებულიცაა. ხელისუფლება კატეგორიული წინააღმდეგია, რომ შეიცვალოს საარჩევნო სისტემა. მინდა, კიდევ ერთხელ შევახსენო საზოგადოებას, რომ ეს იყო მათი წინასაარჩევნო დაპირება.
„ქართული ოცნება" წინასაარჩევნოდ აცხადებდა, რომ მაჟორიტარები ჩამოყალიბდნენ ფეოდალებად. ეს ადამიანები თვლიან თავიანთ თავს რეგიონების ბატონ-პატრონებად, თავად წყვეტენ ნებისმიერ საკადრო საკითხს და არც ფინანსებთან არიან მწყრალად. სამწუხაროდ, დღეს „ქართული ოცნება" და მასში შემავალი პოლიტიკური პარტიები არ ფიქრობენ ასე და მიაჩნიათ, რომ მაჟორიტარული სისტემა უნდა შევინარჩუნოთ 2020 წლამდე. თურმე, ეს თავად მაჟორიტარების სურვილია და წინააღმდეგობაა მათი მხრიდან, რომ 2016 წლისთვის საარჩევნო სისტემა შეიცვალოს. ასევე აცხადებენ, რომ მსგავსი სახის ცვლილებებს ასე სასწრაფოდ ვერ მიიღებენ.
4 წელი სრულდება 10 თვეში, რაც ისინი ხელისუფლებაში მოვიდნენ და თუკი მოისურვებდნენ საარჩევნო სისტემაში ცვლილებების შეტანას, ამის განხორციელება, ცხადია, შესაძლებელი იყო. დღესაც არ არის ცვლილებები დაგვიანებული. თუმცა, არათუ რაიმე ცვლილებას აპირებენ, არამედ არცერთხელ არ წამოსულა ხელისუფლება ოპოზიციასთან დიალოგზე.
უკვე აღარ მიკვირს ეს ყველაფერი იმ განცხადებებიდან გამომდინარე, რომლებიც ოპოზიციის მისამართით კეთდებოდა. ეს ყველაფერი დააგვირგვინა გუშინ ბატონმა ნარმანიამ, როდესაც თქვა, რომ, თურმე, რა იცის ოპოზიციამ ბიუჯეტი. წინა ხელისუფლების პერიოდში ბატონი ნარმანიაც და მეც ხშირად ვესწრებოდით ხოლმე ბიუჯეტის განხილვებს და ძალიან კარგად მახსოვს მისი მწვავე ოპოზიციური ხედვები. მინდა ვკითხო მას, როდესაც „ქართული ოცნება" იყო „ნაციონალური მოძრაობის" ოპოზიციაში, მაშინ არაფერი იცოდა „ქართულმა ოცნებამ"? ნუ გავაკეთებთ ისე, რომ აბსოლუტურად ყველაფრის დევალვირება მოვახდინოთ ამ ქვეყანაში, რაც დემოკრატიის საყრდენს წარმოადგენს. ეს არის: მედიის თავისუფლება, სასამართლოს თავისუფლება, საარჩევნო სისტემა და ზოგადად ოპოზიციის მიმართ პატივისცემა. რომელი დარჩა აქედან, რომლის დაკნინებასაც არ ეცადა ხელისუფლება?!
- როგორ აფასებთ „რუსთავი 2"-ის გარშემო მიმდინარე პროცესებს?
- მიუხედავად ჩემი დამოკიდებულებისა „რუსთავი 2"-ის მიმართ, მიუხედავად იმისა, რომ მეც მიმაჩნია, რომ ეს არის „ნაციონალური მოძრაობის" ინტერესების გამტარებელი მედიასაშუალება, მათ კონსტიტუცია არ უკრძალავს, იყვნენ ასეთები. ისევე როგორც არ უკრძალავს „ობიექტივს", რომ იყოს „პატრიოტთა ალიანსის" ტელევიზია და ისევე, როგორც არ უკრძალავს „JDS"-ს, რომ იყოს „ქართული ოცნების" ტელევიზია. ამიტომ, ის, რაც არ ეწინააღმდეგება კანონს, არავითარ შემთხვევაში არ შეიძლება დაისაჯოს და ამ შემთხვევაში, ცხადია, ყველანი ვდგავართ „რუსთავი 2"-ის გვერდით. მიმაჩნია, რომ დღევანდელ სიტუაციაში ხელისუფლების კონტროლისა და გავლენისგან თავისუფალი ტელევიზია ქვეყანას სჭირდება. ეს სჭირდება დემოკრატიის განვითარებას.
- არის თუ არა სასამართლო ხელისუფლების გავლენისგან თავისუფალი?
- ჩვენ ვხედავთ, რა დღეშია სასამართლო. იგლიჯება ხელისუფლების იგლიჯება ზეწოლისგან, გნებავთ საზოგადოების მოთხოვნისგან. მიმაჩნია, რომ ის განცხადებები, რომლებიც გვესმის ხელისუფლების მხრიდან, ხელისუფლების მიმართ ლოიალურად განწყობილი ექსპერტების მხრიდან, არის აბსოლუტურად მიუღებელი.
რას ნიშნავს, რომ სასამართლო სისტემას არ უნდა ვაკრიტიკებდეთ და მათ მიმართ არ უნდა გაისმოდეს განცხადებები?! ვსვამ კითხვას, თავის დროზე „ახალ მემარჯვენეებს", სხვა ოპოზიციურ ძალებს, რომლებიც „ნაციონალური მოძრაობის" წინააღმდეგ საპროტესტო აქციებს აწყობდნენ, არ უნდა მოეწყოთ ეს აქციები და არ უნდა გაეკრიტიკებინათ სასამართლო, სადაც გამოდიოდა განაჩენი, რომელზეც აშკარად იყო „ნაციონალური მოძრაობის" დაღი დასმული?! არ უნდა გვეკრიტიკებინა?! მაშინ ვერც ქვეყნის შიგნით და ვერც გარეთ ვერავინ გაიგებდა, რომ არ გვყავს თავისუფალი და სამართლიანი სასამართლო. ეს უნდათ მათ? ამას ვერ მიიღებენ.
ეს არის ორმაგი სტანდარტი, არასწორი მიდგომა ოპოზიციის მიმართ. ეს ყველაფერი, სამწუხაროდ, დანარჩენი მსოფლიოს თვალში ხელისუფლების დისკრედიტაციას ახდენს. ხელისუფლება უნდა ხვდებოდეს, რომ ეს არა მხოლოდ მათი, არამედ მთელი ქვეყნის დისკრედიტაციაა.
- საარჩევნო სისტემის ცვლილებაზე საუბრობდით. სწორედ ამ მოთხოვნით „პატრიოტთა ალიანსის" ლიდერები კანცელარიის წინ უკვე რამდენიმე დღეა შიმშილობენ. თქვენ ისინი მოინახულეთ კიდეც. რომ გვითხრათ, ეთანხმებით თუ არა მათ მოთხოვნას და პროტესტის გამოხატვის ასეთ ფორმებს?
- ერთი ამბავი ატეხეს „პატრიოტთა ალიანსის" მოშიმშილეთა ჯგუფთან ჩვენი ვიზიტის გამო. ჩვენ წმინდა ადამიანური მოსაზრებების გამო და იმის გამო, რომ თავად გვაქვს ძალიან მწარე გამოცდილება, თუ როგორ ვშიმშილობდით პარლამენტის თავმჯდომარის მისაღებში და როგორ არ მოგვცეს საშუალება, ცივ ამინდში პლედები დაგვეფარებინა, ზუსტად აქედან გამომდინარე მივედით და ადამიანური თანადგომა გამოვუცხადეთ მოშიმშილეებს. მივედით არა იმის გამო, რომ „პატრიოტთა ალიანსის" იდეოლოგიაა ჩვენთვის მისაღები, არამედ ადამიანური თანაგრძნობა გამოვხატეთ. პირველ რიგში ვართ ადამიანები და შემდეგ პოლიტიკოსები. ამიტომ მიმაჩნია, რომ სწორად მოვიქეცით. მორალური მხარდაჭერა გამოვუცხადეთ და ეს ნორმალურია.
- როგორ აფასებთ საერთაშორისო ორგანიზაციებისა და მეგობარი ქვეყნების განცხადებებს, რომლებიც „რუსთავი 2"-ის გარშემო მიმდინარე პროცესებს უკავშირდება?
- საგანგებოდ ამოვიღე, 2007 წელს როგორი განცხადებები ჰქონდათ საერთაშორისო ორგანიზაციებს, მეგობარი ქვეყნების საელჩოებს. ზოგი საგარეო საქმეთა მინისტრის დონეზე იყო ჩამოსული, ზოგი სხვა დონეებზე. მინდა გითხრათ, რომ აბსოლუტურად იდენტური განცხადებებია. ისინი მაშინ აქ იყვნენ, თბილისში და ზუსტად ასეთ ტონში აკრიტიკებდნენ „ნაციონალურ მოძრაობას", როგორც დღეს აკრიტიკებენ „ქართულ ოცნებას". ასევე იყვნენ ქართული არასამთავრობო ორგანიზაციებიც.
