ოზურგეთის მუნიციპალიტეტის გამგებელმა მერაბ ჭანუყვაძემ დღეს შრომის თემში დასრულებული ინფრასტრუქტურული პროექტები დაათვალიერა.
სოფელ შრომის შიდა გზების უმეტესობა ამორტიზებულია. მუნიციპალიტეტი რთული საგზაო მონაკვეთების რეაბილიტაციას ეტაპობრივად ახორციელებს. ამ ეტაპისთვის დასრულებულია ბეტონის გზის მოწყობა ზედუბანში.
რკინაბეტონის 110-მეტრიანი მონაკვეთი სტიქიის შედეგების სალიკვიდაციოდ გამოყოფილი თანხის ფარგლებში შეკეთდა.
სამუშაოების ღირებულება 15 269 ლარს შეადგენს. დასრულდა მცირე ზომის ხიდის მონტაჟი ქადეიშვილების უბანში. ხიდი გასულ წელს ადიდებულმა ღელემ წაიღო და რამდენიმე ოჯახი სოფლის ცენტრს მოწყვიტა. ადგილობრივები გადაადგილებას შემოვლითი გზებით ახერხებდნენ. იქვე მოეწყო ნიაღვრის შემაკავებელი გაბიონი. სამშენებლო სამუშაოები შპს „ჰიდრომშენმა" განახორციელა.
