სტიქიის შედეგად ქალაქ სენაკის შესასვლელთან გზა ჩამოიშალა. საავტომობილო გზების დეპარტამენტის ინფორმაციით, ინტენსიური წვიმების შედეგად ადიდებულმა წყალმა სენაკში დროებითი შემოსავლელი გზა გამორეცხა.
საქართველოს რეგიონული განვითარებისა და ინფრასტრუქტურის სამინისტროს ცნობით, თბილისი-სენაკი-ლესელიძის საავტომობილო გზის 293-ე კილომეტრზე (ქ. სენაკში შესასვლელთან), აღნიშნული გზა, არსებული მილ-ხიდის რეაბილიტაციასთან დაკავშირებით იყო მოწყობილი. დაზიანებულია ასევე იქვე გამავალი ცენტრალური მაგისტრალის ნაწილიც.
უსაფრთხოების ზომების დაცვის მიზნით, აღნიშნულ მონაკვეთზე ყველა სახის ავტოტრანსპორტის მოძრაობა აიკრძალა და გადაერთო ქ. სენაკში გამავალ საავტომობილო გზაზე.
ამ დროისათვის, სტიქიით დაზიანებულ ობიექტზე საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის წარმომადგენლები მუშაობენ, რომლებიც შექმნილ ვითარებას სწავლობენ, რათა წყლის დონის დაწევისთანავე დაიწყონ გზის აღდგენის სამუშაოები.
დაწესებული რეჟიმით მოძრაობა განხორცილდება საპატრულო პოლიციის უშუალო ზედამხედველობითა და კოორდინაციით.
