17 ნოემბერს, „გალაკტიონობაზე", ვანის რაიონში ქართული კინოსა და თეატრის მსახიობის კარლო საკანდელიძის სახელობის თეატრი გაიხსნება. თეატრს, რომელიც ვანში მდებარეობს, რუსთაველის თეატრის მსახიობის ედმონდ მინაშვილის ინიციატივით რეაბილიტაცია ჩაუტარდა და კარლო საკანდელიძის სახელი მიენიჭა. 17 ნოემბერს, „გალაკტიონობაზე", თეატრი სპექტაკლით „მოხუცი ჯამბაზები" გაიხსნება:
„ამ სპექტაკლში კარლო საკანდელიძეც თამაშობდა, ბოლო წლებში მან ვეღარ შეძლო სპექტაკლში მონაწილეობის მიღება. „მოხუც ჯამბაზებში" თამაშობენ კარლოს მეგობრები და მისი თაობის არტისტები.
მახსოვს, ახალი მისული ვიყავი თეატრში. ფოიეში ვისხედით მსახიობები. კარლო საკანდელიძემ როცა გაიგო, ვანელი ვიყავი, გახედა გურამ საღარაძეს, კახი კავსაძეს და თქვა - ისე არ მივდივარ თეატრიდან, ერთ ვანელს მაინც ვტოვებო..." - ამბობს ედმონდ მინაშვილი „რეპორტიორთან" საუბარში.
ამას გარდა, უახლოეს პერიოდში იგეგმება კარლო საკანდელიძის სახლ-მუზეუმის გახსნაც:
„ვანში, ასევე ძალიან მალე, ახალ წლამდე გაიხსნება კარლო საკანდელიძის სახლ-მუზეუმი, სადაც ის დაიბადა და გაიზარდა. პროექტის განხორციელებისთვის მადლობას ვუხდი ვანის რაიონის მუნიციპალიტეტს და გამგებელ ზაზა ხუციძეს", - აცხადებს რუსთაველის თეატრის მსახიობი ედმონდ მინაშვილი.
