ქართველი მსახიობი, პოპულარული სპორტული კომენტატორი, საქართველოს დამსახურებული არტისტი, საქართველოს სახალხო არტისტი კოტე მახარაძე 1926 წლის 17 ნოემბერს დაიბადა.

კოტე მახარაძე დაიბადა თბილისში. 1934 წელს შევიდა ქორეოგრაფიულ სტუდიაში, რომელიც წარმატებით დაამთავრა 1941 წელს. 1944 წელს ასევე წარმატებით დაამთავრა სკოლა და ჩააბარა თბილისის შოთა რუსთაველის სახელობის თეატრალურ ინსტიტუტში, რომელიც 1948 წელს წარმატებით დაამთავრა და მიღებულ იქნა რუსთაველის სახელობის აკადემიურ თეატრში. ამ თეატრში მან დაჰყო 23 წელი. 1970 წლიდან გადავიდა კ. მარჯანიშვილის სახელობის აკადემიურ თეატრში. 1973-74 წლებში იყო შ. რუსთაველის სახელობის თეატრისა და კინოს სახელმწიფო ინსტიტუტის (დღეს უნივერსიტეტი) ტელეჟურნალისტიკის ფაკულტეტის დეკანი, პროფესორი. 1997 წელს ქ. თბილისში დააარსა ერთი მსახიობის თეატრი „ვერიკო", რომლის სამხატვრო ხელმძღვანელი და მსახიობი იყო სიცოცხლის ბოლომდე. თეატრში მოღვაწეობის პარალელურად იგი გატაცებული იყო სპორტული ცხოვრებით, იგი იყო საქართველოს კალათბურთის ახალგაზრდული ნაკრების კაპიტანი, 1945 წელს მოიპოვა საბჭოთა კავშირის თასი, თამაშობდა კალათბურთს თბილისის „დინამოში". 1957 წლიდან მოღვაწეობა დაიწყო სპორტულ კომენტატორად ჯერ საქართველოს, ხოლო შემდგომ საკავშირო რადიოსა და ტელევიზიაში. 40 წლის განმავლობაში მიჰყავდა რეპორტაჟები ქართულ და რუსულ ენებზე. მას მიჰყავდა თბილისის „დინამოს" ფეხბურთელთა გუნდის ორი ისტორიული თამაშის რეპორტაჟი - 1964 წელს (ეროსი მანჯგალაძესთან ერთად) „დინამო" გახდა საბჭოთა კავშირის ჩემპიონი, ხოლო 1981 წელს მოიპოვა ევროპის თასების თასი.

დაჯილდოებულია შრომის წითელი დროშის და ღირსების ორდენებით. კოტე მარჯანიშვილისა და ახმეტელის პრემიების ლაურეატი. თბილისის საპატიო მოქალაქე.

კოტე მახარაძე გარდაიცვალა 2002 წლის 19 დეკემბერს.