ევროკავშირის „მერების შეთანხმების"  სადემონსტრაციო პროექტების პროგრამის (CoMDeP) ფარგლებში, დღეს, რუსთავის #6 საბავშვო ბაგა-ბაღის სრული ენერგოეფექტური რეაბილიტაცია დაიწყო.

სარეკონსტრუქციო სამუშაოების მიმდინარეობას დღეს, რუსთავის მერი დავით ჯიქია, მერის მოადგილე ნოდარ შეროზია, პარლამენტის ვიცე-სპიკერის, რუსთავის მაჟორიტარი დეპუტატის ზვიად ძიძიგურის ბიუროს ხელმძღვანელი სოფო ჯიქია და მდგრადი ენერგეტიკისა და პოლიტიკის ცენტრის დირექტორი კარინა მელიქიძე ადგილზე გაეცნენ.

პროექტს - „ქალაქ რუსთავში სამი საბავშვო ბაღის (№6 №40 №41) რეკონსტრუქცია ენერგოეფექტურობის მაღალი სტანდარტის მიღების და ნახშიროჟანგის ემისიების შემცირების მიზნით" - ევროკავშირის მხარდაჭერითა და დაფინანსებით, მდგრადი განვითარებისა და პოლიტიკის (SDAP) ცენტრი და ქალაქ რუსთავის მერია ერთობლივად ახორციელებენ.

პროექტის პირველი ეტაპის ფარგლებში №6 საბავშვო ბაღში გათბობისა და ცხელი წყლის მომარაგების სისტემების (მზის კოლექტორებთან კომბინაციაში), მოდინებული-გამწოვი სავენტილაციო სისტემის, ახალი ელექტროტექნიკური სისტემის, ენერგოეფექტური ფანჯრების დამონტაჟება მოხდება. მეორე ეტაპისთვის განხორციელდება შენობის გარე კონსტრუქციის დათბუნება. პირველი ეტაპის სამუშაოები 2016 წლის თებერვალში დასრულდება. რეკონსტრუქციის სამუშაოებს სააქციო საზოგადოება „საქფეთქმრეწვი" ასრულებს.