წელს, ივნისში, თავდაცვის სამისინტროს ქუთაისის ბაზაზე 160 ჯარისკაცი მოიწამლა.
სამწუხაროდ, ეს ჭორი არ არის - სიმართლეა!
ჭორი არც ის გახლავთ, და ამის შესახებ გენერალ გიგი კალანდაძის პროცესზეც ითქვა, რომ ქართულ ჯარში ეს პირველი შემთხვევა არ არის. მანამდე, რამდენიმე ხნით ადრე მსგავსი თბილისშიც მოხდა და უხარისხო საკვებმა პროდუქტებმა, ლამის, 35 ჯარისკაცი იმსხვერპლა.
ისიც სიმართლეა, რომ ჯარისკაცების მოწამვლის გამო „ქართული კვების კომპანიის" მენეჯმენტი შეიცვალა. კომპანიისა, რომელიც უშუალოდ ახორციელებს სამხედროების კვებას. მოხდა ისიც, რომ თავდაცვის სამინისტროში ჩაიშალა ტენდერებიც.
ეს ყველაფერი ასე მოხდა და სიმართლეა, მაგრამ რამდენად არის სიმართლე ის ჭორი, რომ ტენდერის „ჩაშლის" მიზეზი კომპანია „ეკო მითი" იყო და რომლის გამარჯვებაც თითქმის ყუაზე იყო მისული...
დადის მოარული ხმები იმის შესახებაც, რომ ამის შემდეგ, ყოველგვარი ტენდერის გარეშე, ქუთაისში სამხედრო ნაწილების პროდუქტით მომარაგებას ისევ აგრძელებენ შაშკინისა და ახალაიას მინისტრობის დროინდელი მომმარაგებლები - „ფუდსერვისი", „მეგაფუდი", „ექსმეტი" ამარაგებენ იმიტომ, რომ ყავთ გავლენიანი პატრონი - არჩილ გეგენავა. ხელისუფლება შეიცვალა. თუმცა, არჩილ გეგენავა არ იცვლება!
დიახ, გეგენავა შეუცვლელია, მიუხედავად იმისა, რომ მასზე და მისი ფირმების საქმიანობაზე ბევრი ითქვა და ბევრი დაიწერა... მათ შორის „ვერსიაშიც" გამოქვეყნდა ვრცელი სტატია. ამ ეტაპზე არავინ არაფერს ამბობს იმის შესახებ, თუ ახლა ვისი წყალობით ინარჩუნებს გავლენებს არჩილ გეგენავა თავდაცვის სამინისტროში. არადა, გიგი კალანდაძის სასამართლო პროცესზე ამ ფაქტებს ჯიუტად ასახელებენ და მრავალმნიშვნელოვან კითხვებსაც სვამენ.
მოგეხსენებათ, ჭორი მეტ-ნაკლებად დაუსაბუთებელ ამბავს ნიშნავს. ჰოდა, ერთი ასეთი ვარაუდი, ანუ ჭორი „მეგაფუდშიც" გვითხრეს: თურმე, ისინი აღარ ამარაგებენ თავდაცვის სამინისტროს საკვები პროდუქტებით.
როდიდან? დუმილი!
მიზეზი - ისევ დუმილი!
რატომღაც გვგონია, რომ ეს ჭორი, ამ თემაზე, უკანასკნელი არ არის...
