პარლამენტის ვიცე-სპიკერი მანანა კობახიძე „რეპორტიორთან" საუბრისას ამბობს, რომ არ ენდობა NDI-ს კვლევებს. ამასთანავე, კობახიძე კომენტარს აკეთებს პრემიერ-მინისტრის მიერ გამართული სამი წლის მუშაობის ანგარიშის პრეზენტაციაზე. ვიცე-სპიკერის განმარტებით, ამ ანგარიშში დეტალურად არის გადმოცემული ყველა მიმართულება, და ის  მნიშვნელოვანი რეფორმები, რაც მთავრობამ გაატარა ამ წლების განმავლობაში:

„NDI-ის კვლევების მიმართ ნაკლები ნდობა მაქვს. დღეს პრემიერმა 3 წლიანი ანგარიში ჩაატარა, სადაც ძალიან დეტალურად არის გადმოცემული ყველა მიმართულება და ის  მნიშვნელოვანი რეფორმები, რაც მთავრობამ გაატარა ამ წლების განმავლობაში.

ვფიქრობ  გამოსვლაში პრემიერმა ამომწურავად ისაუბრა იმაზე, თუ როგორ მუშაობდა მთავრობა  საშინაო თუ  საგარეო მიმართულებით. ძალიან მნიშვნელოვანია ის, რომ ქვეყნის ბიუჯეტის თითქმის მესამედი სწორედ ჯანდაცვას ხმარდება, ეს იყო სასიცოცხლო მნიშვნელობის რეფორმა. მნიშვნელოვნად გაზრდილია განათლების დანახარჯები. აქცენტები გაკეთებულია სოციალურად დაუცველებზე, დევნილებსა და მათი საცხოვრებელი ფართით უზრუნველყოფაზე. დევნილებს ექმნებათ ღირსეული ცხოვრების პირობები და აღარასდროს განმეორდება მათი გამოსახლება.

სოფლის მეურნეობის პროექტების დაფინანსება, ახალი აბრეშუმის გზის პროექტი, ახალი ინვესტიციები ენერგეტიკაში, გაზიფიცირება, 20-ზე მეტი სოფლის ელექტროფიცორება, სადაც წლებია დენი არ არის, უამრავი სამართლებრივი საკითხები, არასრულწლოვანთა  მართმსაჯულების კოდექსი, პატიმრებისთვის პირობების გაუმჯობესება... უამრავი თემაა, რაზეც აქცენტები იყო  გაკეთებული. ვისაც სურს ამის დანახვა ის ხედავს,  ვისაც არ სურს იმას არც უნდა ეკამათო.

არ გავცნობილვარ NDI-ის კვლევებს, რადგან არ ვენდობი. ყველასთვის გასაგები უნდა იყოს ვინ არის კვლევებზე მომუშავე. ამერიკულ ორგანიზაცია NDI-ის  ვენდობი, მაგრამ არა იმ ადამიანებს, რომლებიც საქართველოში კვლევას ატარებენ. ასე რომ არამგონია ამაზე დროის დაკარგვა ღირდეს" - განაცხადა კობახიძემ „რეპორტიორთან" საუბრისას.