ტელეკომპანია „BBC"-სთვის მიცემულ ინტერვიუში „იუკოსის" ყოფილი ხელმძღვანელი მიხეილ ხოდორკოვსკი ამბობს, რომ შესაძლოა, დიდ ბრიტანეთს პოლიტიკური თავშესაფრის თხოვნით მიმართოს.

ხოდორკოვსკის განცხადებით, უკვე აშკარაა, ვლადიმირ პუტინი მას წინასაარჩევნოდ სერიოზულ საფრთხედ აღიქვამს. ხოდორკოვსკი ამ დროისთვის შვეიცარიაში იმყოფება.

რუსეთის საგამოძიებო ორგანოს სპეციალურმა წარმომადგენელმა ვლადიმირ მარკინმა ჟურნალისტებს განუცხადა, რომ „იუკოსის" ყოფილ ხელმძღვანელ მიხეილ ხოდორკოვსკიზე რუსეთმა საერთაშორისო ძებნა გამოაცხადა.

რუსეთის საგამოძიებო კომიტეტმა მიხეილ ხოდორკოვსკის ბრალი დაახლობით ორი კვირის წინ დაუსწრებლად წაუყენა.

რუს ოლიგარქს 1998 წელს ქალაქ ნეფტეიუგანსკის მერის ვლადიმირ პეტუხოვის მკვლელობაში ადანაშაულებენ. გამოძიების თანახმად, ხოდორკოვსკი ასევე, პეტუხოვის თანმხლები პირის ვიაჩესლავ კოკოშკინის სიცოცხლის ხელყოფის და ბიზნესმენ ევგენი რიბინზე ორ თავდასხმაში არის ბრალდებული.

მანამდე ხოდორკოვსკიმ განაცხადა, რომ გამოძიებამ ის ბრალდებულის სტატუსით დაიბარა, თუმცა დაკითხვაზე გამოცხადებას არ აპირებს.

დაკავების შემთხვევაში, ბიზნესმენს სამუდამო პატიმრობა ემუქრება.

ამჟამად მიხეილ ხოდორკოვსკი ლონდონში ცხოვრობს. ის 2013 წელს რუსეთის პრეზიდენტმა ვლადიმირ პუტინმა შეიწყალა.

მოამზადა სალომე ჯანდიერმა