გლობალური კვლევების ცენტრის ხელმძღვანელი ნანა დევდარიანი „რეპორტიორთან" საუბრისას აფასებს 2015 წელს და ამასთან ირაკლი ღარიბაშვილის გადადგომის შესახებ საუბრობს. მისი თქმით საჭიროა სისტემური ცვლილებები და რაც მთავარია სამართლიანობის აღდგენის რეალური მაგალითები უნდა გამოჩნდეს.
„რთულია 2015 წელი დადებითად შეაფასო, როცა საკმაოდ ახლოს საომარი მოქმედებები მიმდინარეობს და უკრაინის კონფლიქტი თითქოს გაიყინა, მაგრამ მაინც საკმაოდ მწვავეა.
საქართველოსთვის, როგორც წელი საკმოდ მძიმე იყო, თუმცა ჩვენი მოსახლობისთვის ყველაზე რთული მაინც ლარის გაუფასურება და ცხოვრების დონის ვარდნა იყო.
ერთ-ერთი რაც დადებითად შემიძლია შევაფასო არის საყოველთაო ჯანდაცვა, რაც ღარიბაშვილის პლიუსებში ითვლება, სოფლის მეურნეობის პროგრამები, გახსნილი საწარმოები, ამას გარდა ორი მნიშვნელოვანი მოვლენა, ვიზა-ლიბერალიზაციისთვის ევროკომისიის დადებითი დასკვნა და პარალელურად რუსეთთან სავიზო რეჟიმის გამარტივება.
ირაკლი ღარიბაშვილი ახალგაზრდა, ჯანღონით სავსე, ენერგიული, კარგი ეროვნული პოზიციების მქონე ადამიანია და ხალხი ამას უფასებს. ამდენად ღარიბაშვილის გადადგომა ცოტა არ ოყოს მოულოდნელი იყო, თუმცა მე ჯერ კიდევ გაზაფხულზე ვამბობდი, არჩევნებამდე ერთი წლით ადრე, რომ, როგორც ჩანს პრემიერი შეიცვლება, რათა ამომრჩეველს რაღაც ცვლილებები დაანახონ. ეს არ იქნება საკმარისი, რადგან ყველაზე მარტივი ცვლილებაა. საჭიროა სისტემური ცვლილებები, რაც მთავარია სამართლიანობის აღდგენის რეალური მაგალითები უნდა გამოჩნდეს, სხვანაირად ამომრჩეველი ამას არ დაკმაყოფილდება. ამომრჩეველი ღარიბაშვილის უკმაყოფილო ნამდვილად არ იყო" ,- ამბობს დევდარიანი" - ამბობს ნანა დევდარიანი.
