რას უკავშირებს ირაკლი ღარიბაშვილის მოულოდნელ გადაწყვეტილებას პარლამენტარი სოსო ჯაჭვლიანი - ამ თემაზე დეპუტატი „კვირის ქრონიკას" ესაუბრა. მიუხედავად იმისა, რომ ღარიბაშვილი დღეს სათადარიგო სკამს იკავებს, ჯაჭვლიანი დარწმუნებულია, რომ გადამდგარი პრემიერი გუნდში მთავარ პოზიციას შეინარჩუნებს და „ძირითად ნაკრებში ფორვარდის ფუნქციას შეასრულებს".
„ახლა ვერ დავაკონკრეტებ, რა და როგორ იქნება, არც ის ნიშნავს არაფერს, რომ პარტიის თავმჯდომარეობიდან გადადგა, ირაკლი ღარიბაშვილი ახალგაზრდა კაცია, მან მიიღო უზარმაზარი გამოცდილება, ჯერ 33 წლისაა, ამ ასაკში ზოგი უნივერსიტეტს ამთავრებს. მისი გამოცდილება მომავალში გამოსაყენებელი იქნება... რაც შეეხება მისი წასვლის კონკრეტულ მიზეზს, მე არ ვიცი. ის წავიდა მაშინ, როცა იყო ზენიტში და როცა უკვე მართლა ბევრი რამ ჰქონდა გაკეთებული. ახლა ვნახოთ რას იზამს", - განაცხადა ჯაჭვლიანმა.
წყარო: „კვირის ქრონიკა"
(მოამზადა ალა გრიგალაშვილმა)
