„ლევან მურუსიძე რომ არ უნდა დაენიშნათ მოსამართლედ, ეს უდავოა და საკამათო არ გახლავთ, მაგრამ რა კონტექტში არ უნდა იყოს დანიშნული, ამაზე მინდა გავამახვილო ყურადღება", - ამ განცხადებას „ყოფილი პოლიტპატიმრები-ადამიანის უფლებებისთვის" თავმჯდომარე ნანა კაკაბაძე „კვირის ქრონიკასთან" ინტერვიუში აკეთებს:

„9 წელიწადში 150 უდანაშაულო ბიჭი ჩაცხრილეს ქუჩაში, მაგრამ მათი მკვლელები არ დასჯილან, არადა იყო გამოძიება, სასამართლო პროცესები. ამ უბრალოდ განწირული ბიჭებიდან ყველას არ ჰყავდა ისეთი თავგადადებული, გმირი დედა, როგორიც ირინა ენუქიძე იყო. მაგრამ, ამ ხალხს შვილები დაუხოცეს და ამაზე დიდი საშინელება აღარ არსებობს. და, რადგან ამ ბიჭებს არ ჰყავთ ირინა ენუქიძისთანა თავგადაკლული დედა, მათი მკვლელების ხელის დამფარებლები არ უნდა დაისაჯონ? ამ საქმეებში ვინც იყვნენ, რომელიმე მოსამართლე, პროკურორი, გამომძიებელი დასაჯა დღევანდელმა ხელისუფლებამ? ისინი არ არიან მურუსიძეები და უარესებიც? ამ ხალხის უმეტესობა დღეს ისევ თავის პოსტზე მუშაობს! ყველა მურუსიძე უნდა ჩამოშორდეს ხელისუფლებას და ყველამ უნდა აგოს პასუხი კანონის წინაშე!", - აცხადებს ნანა კაკაბაძე „კვირის ქრონიკასთან" საუბარში.

წყარო: კვირის ქრონიკა