საქართველოს პრემიერ-მინისტრი გიორგი კვირიკაშვილი გაზეთ „კვირის პალიტრასთან" მის წარსულ საქმიანობას იხსენებს. როგორც კვირიკაშვილი აცხადებს, მისთვის კარიერა ნომერ პირველი პრიორიტეტი არასდროს ყოფილა.
„სინდისთან კომპრომისზე არასოდეს წავსულვარ. ჩემს ცხოვრებაში ისე ხდებოდა, რომ რაღაც ციკლის მერე თავიდან ვიწყებდი ყველაფერს. არასოდეს ისე არ ვიქცეოდი, რაც კარიერულად სასარგებლო იქნებოდა. სულიერი სიმშვიდე, ოჯახთან ყოფნა და ანალიტიკური საქმიანობა მირჩევნია. თუმცა არც „ქართუ" ბანკში მქონია მშვიდი სამუშაო. ეს იყო ბიზნესზე ორიენტირებული ბანკი, სადაც იმდენი მოვახერხეთ, რომ არ გვქონოდა ხისტი კაპიტალისტური მიდგომა. ჩვენთვის მთავარი იყო ადამიანური დამოკიდებულება. ეს ჰუმანურობისა და კაპიტალიზმის ნაზავია. ამის საშუალება ჩვენმა დამფუძნებელმა მოგვცა, რომელიც ბანკისგან ზემოგებებს არ ითხოვდა და გვეუბნებოდა, ისე მიუდექით ბიზნესს, რომ ვიღაცას სახლი არ წაართვათო. ჩვენი მიდგომა ასეთი იყო: აგვერიდებინა ადამიანებისათვის სარისკო გადაწყვეტილების მიღება."- აცხადებს კვირიკაშვილი.
