თურქეთში მიმდინარე გამოძიების პარალელურად, ეკატერინე აბაშიძე ენტონი ვან დეიკის ტილოსთან დაკავშირებით დაკითხვაზე ქართველმა სამართალდამცველებმა დაიბარეს.
აბაშიძემ „რუსთავი 2"-ს განუცხადა, რომ ის აპირებს ვან დეიკის ტილოსთან დაკავშირებით სამართალდამცველებს სრული ინფორმაცია მიაწოდოს და შესაბამისი დოკუმენტაცია წარუდგინოს.
„ტილოს თაობაზე სურთ შეხვედრა და არ ვიცი როგორ განვითარდება მოვლენები. ამ ეტაპზე რაც მაქვს იმ ინფორმაციას მივაწვდი, მათ შორის ჰუსეინოვის ხელწერილს და სასამართლო გადაწყვეტილებას. ორშაბათს კი სასამართლოდან ამოვიღებ ყველა იმ დოკუმენტს, რაც არსებობს და დამატებით ინფორმაციას წარვადგენ", - განაცხადა აბაშიძემ.
მისი თქმით, ის უჩივის ჰუსეინოვს, რომელმაც თაღლითობით წაიღო ტილო და სრული თანხა არ გადაიხადა.
ასევე, კურიერს დაუკავშირდა ეკატერინე აბაშიძის ძმისშვილი რევაზ აბაშიძე, რომელიც ამბობს, რომ ტილო მამამისმა 15 წლის წინ შეიძინა, თუმცა მათთვის უცნობი იყო თუ ვინ იყო მისი ავტორი. რევაზ აბაშიძე ამბობს, რომ წლების განმავლობაში ტილო მის საცხოვრებელ სახლში ინახებოდა და შემდეგ უკვე ის გადაიტანეს ეკატერინე აბაშიძესთან.
სტამბოლში საქართველოდან კონტრაბანდული გზით გატანილი ჰოლანდიელი მხატვრის, ენტონი ვან დეიკის ნახატი აღმოაჩინეს.
