„ქართული ოცნება-დემოკრატიული საქართველოს" წევრი,  დეპუტატი თამაზ მეჭიაური საქართველოს პრეზიდენტის, გიორგი მარგველაშვილის მიერ  „საარჩევნო კოდექსში" განხორციელებულ ცვლილებებზე ხელის მოაწერას აფასებს და აღნიშნავს, რომ მარგველაშვილის განცხადებები გაუგებარია.  

„გაუგებარია მარგველშვილის განცხადება საარჩევნო ცვლილებებთან დაკავშირებით. არ მესმის, თუ ხელი მოაწერა, მაშინ რაღას  წუწუნებს? რამე უკეთესი შემოგვთავაზა? მას ადრევე ჰქონდა წამოწყებული ეს კამპანია და არ მინდა ახლა ამაზე კომენტარი გავაკეთო. მას ჰკითხეთ ჯობია.

მეც არ მომწონს ბევრი რამ ამ კანონში, მაგრამ ყოველ შემთხვევაში ისეთი კანონია, რომელიც ჩიხში არ შეიყვანს სიტუაციას. ჩემი აზრით, შეიძლებოდა უკეთესი ყოფილიყო, თუმცა, მე სრულიად სხვა მიმართულებით მგონია შესაცვლელი... მე მაინც მგონია, რომ ყველა მუნიციპალიტეტს, ყველა რაიონს უნდა ჰყავდეს თავისი მაჟორტარი დეპუტატი."- განაცხადა მეჭიაურიმა „პრაიმთაიმთან" საუბარში.  

კითხვაზე, თუ რითი ხსნის პრეზიდენტის უკმაყოფილებას, თუკი აღნიშნულ კანონს მან თავადვე მოაწერა ხელი, თამაზ მეჭიაური პასუხობს:

„ეს მას უნდა ჰკითხოთ. ის სულ უკმაყოფილოა და რა ვქნათ ახლა. თუმცა, თუ კანონი შეუსაბამოა კონსტიტუციასთან და კანონმდებლობასთან, ის ხელს არ მოაწერდა."- აცხადებს მეჭიაური.

საქართველოს პრეზიდენტმა "საარჩევნო კოდექსში" განხორციელებულ ცვლილებებს ხელი მოაწერა.

პარლამენტის მიერ "საარჩევნო კოდექსში" შეტანილი ცვლილებებით, 73 მაჟორიტარული საარჩევნო ოლქის საზღვრები იცვლება - ხდება ცალკეული ოლქების გაერთიანება, ხოლო ცალკეული ოლქების - დაყოფა.

კერძოდ, თბილისისა და გარდაბნის მუნიციპალიტეტის მარტყოფის ადგილობრივი მაჟორიტარული საარჩევნო ოლქის საზღვრებში 22 მაჟორიტარული ოლქი შეიქმნება. ვანსა და ხონს ერთი მაჟორიტარი დეპუტატი ეყოლება. ცვლილებებით, ერთი მაჟორიტარი დეპუტატი უნდა ჰყავდეს ამბროლაურს, ონს, ლენტეხს, მესტიას და ცაგერს. იცლება ყველა სხვა დანარჩენი მაჟორიტარული ოლქის საზღვარი. თითო მაჟორიტარული საარჩევნო ოლქი კი მხოლოდ საგარეჯოში, გურჯაანში, ხაშურში, საჩხერში, ჭიათურაში, წყალტუბოსა და სამტრედიაში იქნება. მეორე ცვლილება კი, მაჟორიტარი დეპუტატების 50%-იანი ბარიერით არჩევას ითვალისწინებს.