საქართველოს მთავარი პროკურორი ირაკლი შოთაძე ევროსაბჭოს კომისრის მოწოდებას გამოეხმაურა, სადაც პროკურატურის ანგარიშვალდებულებაზეა საუბარი.
„მე არ ვიცი რომელ დასკვნაზე მეუბნებით, ზუსტად არ გავცნობივარ, თუმცა მე შემიძლია გითხრათ, რომ დღესდღეობით საქართველოს პროკურატურა საკმაოდ ანგარიშვალდებულია. კონკრეტულად, ჩვენ ანგარიშვალდებულები ვართ საპროკურორო საბჭოს წინაშე, სადაც მე მომიწევს წარდგომა ანგარიშით ყოველ 6 თვეში ერთხელ ჩვენი სტრუქტურის საქმიანობის შესახებ. ასევე, საკმაოდ მყარი ანგარიშვალდებულება არსებობს პარლამენტის წინაშე და ჩვენ ამ ანგარიშვალდებულებას არ გავურბივართ", -განაცხადა ირაკლი შოთაძემ.
ადამიანის უფლებების სფეროში ევროსაბჭოს კომისარი ნილ მუჟნიეკსი მოუწოდებს საქართველოს ხელისუფლებას, გააძლიეროს პროკურორებისა და ძალოვანი ორგანოების თანამშრომლების მუშაობის გამჭვირვალობა და ანგარიშვალდებულება.
„მიუხედავად იმისა, რომ გარკვეული პოზიტიური ცვლილებებია მთავარი პროკურორის შერჩევის, დანიშვნისა და დათხოვნის პროცედურების კუთხით, კვლავ რჩება კითხვები, რომელიც უკავშირდება მთავარი პროკურატურის მუშაობას სისხლის სამართლის სფეროში." - ნათქვამია განცხადებაში.
