მსოფლიო ჯანდაცვის ორგანიზაციის განცხადებით, ლიბერია ებოლას ვირუსისგან თავისუფალია.

„BBC"-ის ცნობით, ბოლო 42 დღის განმავლობაში ლიბერიაში ებოლათი დაინფიცირების არც ერთი შემთხვევა არ დაფიქსირებულა, რაც იმას ნიშნავს, რომ ამ ქვეყანამ ეპიდემია დაამარცხა.

მომაკვდინებელი ვირუსი გასულ წელს დაამარცხა გვინეამ და სიერა-ლეონემაც. სწორედ აღნიშნული სამი ქვეყანა დააზარალა ყველაზე მეტად ებოლას ეპიდემიამ.

ბოლო მონაცემებით, მსოფლიოს მასშტაბით ებოლას ვირუსს 11 315 ადამიანი შეეწირა. მათგან 4 809 ლიბერიაში, 3 955 სიერა-ლეონეში, 2 536 კი გვინეაში დაიღუპა.