„BBC"-ის ინფორმაციით, ევროპის საბჭოს საპარლამენტო ასამბლეის პრეზიდენტმა ან ბრასერმა განაცხადა, რომ რუსეთი ევროპის საბჭოს საპარლამენტო ასამბლეის სესიებს გარკვეული პერიოდი ვერ დაესწრება.
გადაწყვეტილება მას შემდეგ მიიღეს, რაც მოსკოვმა ზამთრის სესიაზე დასწრებაზე უარი თქვა.
„ვწუხვარ ამ გადაწყვეტილების გამო. ამის შედეგი იქნება შემდეგი: რუსეთის ფედერაციის დელეგაცია ვერ დაესწრება ასამბლეის სესიებს 2016 წლის განმავლობაში, ან სულ მცირე რუსეთში მომავალ საპარლამენტო არჩევნებამდე", - განაცხადა ბრასერმა.
შეგახსენებთ, რომ რუსეთის მიერ ევროპის საბჭოს საპარლამენტო ასამბლეის ზამთრის სესიის გამოტოვების შესახებ რუსეთის დელეგაციის წარმომადგენელმა ლეონიდ სლუცკიმ განაცხადა და განმარტა, რომ რუსეთი ასამბლეას დაუბრუნდება მას შემდეგ, რაც მოსკოვის დელეგაცია ყველა უფლების დაბრუნების გარანტიას მიიღებს.
ამასთან, რუსეთის დელეგაციას ევროსაბჭოს საპარლამენტო ასამბლეაზე 2014 წელს ხმის მიცემის უფლება ჩამოართვეს. მიზეზი კი რუსეთის მიერ ყირიმის არალეგიტიმურად მიერთება გახდა.
